काभ्रेपलान्चोक जिल्ला समन्वय समितिका प्रमुख उद्धव केसीले बनेपा नगरपालिका वडा नं. ६ नीलकण्ठेश्वर धाममा अवस्थित शब्दयात्रा प्रकाशनको अवलोकन गर्नुभयो । त्यस बखत उहाँले नेपालको वाङ्मय क्षेत्रका प्रथम पाँचजना साधकका सालिकहरू रहेको शब्दसाधक तीर्थका साथै शब्दयात्रा स्तम्भ, शब्दयात्रा शारदा मन्दिर, शब्दयात्रा पुस्तकालय, शब्दयात्रा सभाकक्ष र शब्दयात्रा प्रकाशनको कार्यालयको अवलोकन गर्नुभयो ।
उहाँका साथमा नेपाल पत्रकार महासङ्घ काभ्रेका सभापति मोतीराम तिमल्सिना पनि हुनुहुन्थ्यो । उहाँहरूलाई शब्दयात्रा प्रकाशनका संस्थापक अध्यक्ष हरि मञ्जुश्री तथा सञ्चालक सदस्यहरू कृष्णमणि कुइँकेल, हरिगोपाल प्रधान र शिव बन्जाराले स्वागत गर्नुभएको थियो । त्यस बखत नेपालको पहिलो शिक्षासेवी, नेपालको पहिलो लोकतान्त्रिक पत्रकार, राष्ट्रिय पुरस्कार पाउने नेपालको पहिलो वैज्ञानिक, नेपालको पहिलो साहित्यिक सहिद र गीत स्वराङ्कन गर्ने नेपालको पहिलो गायिकाको सालिक एकै ठाउँमा देख्न सकिने बनेपामा मात्रै हो भन्ने जानकारी हरि मञ्जुश्रीले गराउनुभएको थियो ।
उहाँहरूले नीलकण्ठेश्वर महादेव र शेषशायी विष्णुको पनि दर्शन गर्नुभएको थियो ।

शब्दयात्रा प्रकाशनले २०७७ सालको ‘शब्दयात्रा कर्मशीलता पुरस्कार’ सकुल थापालाई प्रदान गर्ने भएको छ । सकुल थापाले शब्दयात्रा प्रकाशनको स्थापनाकालदेखि नै संस्थाका हरेक गतिविधिमा आर्थिक, भौतिक र अन्य विभिन्न प्रकारले योगदान गर्नुभएको छ । उहाँ यसअघिको सञ्चालक समितिमा पनि सदस्य हुनुहुन्थ्यो । ‘नेपालभूमि साप्ताहिक’ को व्यवस्थापनमा पनि उहाँले ठूलो सहयोग पु¥याउनुभएको छ ।
शब्दयात्रा प्रकाशनले हरेक वर्ष ‘शब्दयात्रा कर्मशीलता पुरस्कार’ प्रदान गर्ने गरेको छ । यसअघि यो पुरस्कार पदमनाथ ढुङ्गाना, दामोदर घिमिरे र शिवप्रसाद बन्जारालाई प्रदान गरिसकिएको छ । पुरस्कारको राशी १० हजार रुपियाँ रहेको छ भने पुरस्कारमा शब्दयात्रा पट्ट र प्रमाणपत्र पनि प्रदान गरिन्छ ।
शब्दयात्रा प्रकाशनबाट ‘शब्दयात्रा कर्मशीलता पुरस्कार’ गर्न लागेको यो चौथोपटक हो । यस पटकको कार्यक्रम आगामी असोज १० गते शनिबार काभ्रेपलान्चोक जिल्ला समन्वय समितिका सभापति उद्धव केसीको प्रमुख आतिथ्यमा शब्दयात्रा प्रकाशनको कार्यालयमा हुने भएको छ । कोरोना महामारीका कारण सीमित व्यक्तिको मात्र उपस्थितिमा मास्क र स्यानिटाइजर जस्ता सुरक्षाका उपायसहित सामाजिक दूरीको पालना गर्दै कार्यक्रम गरिने भएको छ ।

काभ्रेपलान्चोक जिल्लाका प्रमुख जिल्ला अधिकारी शिवराम पोखरेलले गत भदौ ३० गते मङ्गलबार बनेपाको नीलकण्ठेश्वर धाममा रहेको शब्दसाधक तीर्थ, शब्दयात्रा स्तम्भ, शब्दयात्रा शारदा मन्दिर, शब्दयात्रा प्रकाशन पुस्तकालय र शब्दयात्रा सभाकक्षको अवलोकन गर्नुभयो । त्यस बखत उहाँले नीलकण्ठेश्वर महादेव, शेषशायी विष्णु, नागदेवता र हनुमानको दर्शन पनि गर्नुभयो ।
प्रमुख जिल्ला अधिकारी शिवराम पोखरेललाई शब्दयात्रा प्रकाशनका अध्यक्ष हरि मञ्जुश्री र सदस्य कृष्णमणि कुइँकेलले स्वागत गर्नुभएको थियो । उहाँहरूले शब्दयात्रा प्रकाशन र नीलकण्ठेश्वर धामका विषयमा जानकारी गराउनुभएको थियो ।
त्यस बखत शब्दयात्रा प्रकाशनका महाप्रबन्धक शारदाप्रसाद शर्मा, पण्डित रमेश अधिकारी, छविलाल कुइँकेल, अमृत अधिकारी र सङ्गीता केसीको पनि उपस्थिति थियो ।

गत २०७६ साल भदौ २३ गते मङ्गलबार कवि सच्युतराज उप्रेती भुम्लुलेले शब्दसाधक तीर्थको अवलोकन गर्नुभयो । उहाँलाई रुद्राक्षको माला र पुष्पगुच्छासहित शब्दयात्रा प्रकाशनका संस्थापक अध्यक्ष हरि मञ्जुश्री र सदस्य शिव बन्जाराले शब्दयात्रा प्रकाशनमा स्वागत गर्नुभएको थियो । कवि उप्रेतीलाई सदस्य रमेश अधिकारी र व्यवस्थापक सङ्गीता केसीले विभिन्न स्थानको अवलोकन गराउनुभएको थियो ।
कवि उप्रेतीले शब्दसाधक तीर्थ, शब्दयात्रा स्तम्भ, शब्दयात्रा शारदा मन्दिर, शब्दयात्रा प्रकाशन पुस्तकालय र सभाकक्षको विशेष अभिरुचिपूर्वक अवलोकन गर्नुभयो । यी संरचनाहरू कसरी तयार भए भन्ने विषयमा उहाँले विशेष चासो राख्नुभएको थियो । ती संरचनाहरूको निर्माणका विषयमा उहाँलाई जानकारी गराइएको थियो ।
त्यस बखत उहाँले हनुमान, नीलकण्ठेश्वर महादेव, पोखरी, शेषशायी विष्णु र नागस्थानको समेत दर्शन तथा अवलोकन गर्नुभएको थियो ।

शब्दयात्रा प्रकाशनका संस्थापक अध्यक्ष हरि मञ्जुश्रीको मोती महोत्सव भव्यताका साथ सम्पन्न गर्न ‘भाषासेवी हरि मञ्जुश्री मोती महोत्सव समारोह समिति’ को गठन गरिएको छ । समितिको सल्लाहकारमा नेपालका शैक्षिक शिरोभूषण डा. सुरेशराज शर्मा रहनुभएको छ ।
अग्रज आख्यानकार भरत जङ्गमको संयोजकत्वमा गठित २३ सदस्यीय उक्त समितिका सदस्यहरूमा पूर्वमन्त्री कान्ता भट्टराई, पूर्वसचिव उर्मिला श्रेष्ठ, गायक, सङ्गीतकार तथा साहित्यकार हिरण्य भोजपुरे, गायक, सङ्गीतकार तथा साहित्यकार गणेश रसिक, वैज्ञानिक प्रा. सुरेशराज चालिसे, नेपालको प्रथम महिला महाप्रबन्धक सावित्री जङ्गम थापा, नियात्राकार तथा उद्यमी घनश्याम राजकर्णिकार, समाजसेवी बेलप्रसाद श्रेष्ठ, नियात्राकार प्राध्यापक पोष चापागाई, बालसाहित्यकार गोपाल पराजुली, पूर्वप्रशासक तथा लेखक चन्द्रबहादुर खड्का, पूर्वप्रशासक तथा लेखक डा. इन्दुल केसी, पूर्वप्रशासक तथा लेखक द्रोणप्रसाद श्रेष्ठ, गीतिभास्कर मच्छेश्वर सापकोटा, ग्रन्थसम्पादक जीवनचन्द्र कोइराला, अग्रज पत्रकार हरिगोपाल प्रधान, लेखक सुनील सापकोटा, कथाकार नवीना श्रेष्ठ, शिक्षासेवी रामप्रसाद अधिकारी, समाजसेवी केशव अर्याल र समाजसेवी किरण थापा तथा सदस्य–सचिवमा निर्मला श्रेष्ठ रहनुभएको छ ।
समारोह समितिले वाङ्मयसेवी हरि मञ्जुश्रीको अभिनन्दनग्रन्थ प्रकाशन गर्ने कार्यका लागि शारदाप्रसाद शर्मा, दामोदर घिमिरे र अमृत अधिकारी रहेको अभिनन्दनग्रन्थ प्रकाशन समिति बनाएको छ ।
काभ्रेपलान्चोक जिल्लामा औपचारिक रूपमा मोती महोत्सव मनाउन लागिएको यो पहिलोपटक हो । कुनै पनि विधाबाट राष्ट्रिय स्तरको योगदान दिने व्यक्तित्वको उमेर छैटौँ दशकमा पुगेको बेला मोती महोत्सव मनाउने गरिन्छ ।

शब्दयात्रा प्रकाशनबाट अर्को कवितासङ्ग्रह पनि प्रकाशन हुने भएको छ । यो सङ्ग्रहसमेत शब्दयात्रा प्रकाशनबाट प्रकाशित पुस्तकहरूको सङ्ख्या १ सय ४५ पुगेको छ ।

अब प्रकाशन हुने कवितासङ्ग्रह काफलबोटे कान्छा अर्थात् रामकुमार हुमागाईंको ‘उठ न साथी उठ’ नामको कवितासङ्ग्रह हो । यसअघि काफलबोटे कान्छाको ‘परदेशको कथा’ नामको कवितासङ्ग्रह शब्दयात्रा प्रकाशनबाट प्रकाशित भएको थियो ।