शब्दयात्रा प्रकाशनले स्थापना गरेको अक्षरसेवी सहयोग कोषलाई १० हजार २ सय ५० रुपियाँ आर्थिक सहयोग प्राप्त भएको छ । विराटनगरमा रहेको पूर्वाञ्चल अनाथाश्रमकी संस्थापिका तथा सञ्चालिका श्रीमती सीता पोखरेलले उक्त रकम सहयोगस्वरूप उपलब्ध गराउनुभएको हो । शब्दयात्रा प्रकाशनले उहाँप्रति हार्दिक आभार व्यक्त गरेको छ ।
विभिन्न प्रकारका विपत्तिमा परेका साहित्यकार, पत्रकार तथा कलाकारहरूलाई आर्थिक सहयोग गर्न स्थापना गरिएको उक्त कोषबाट विभिन्न व्यक्तिहरूले आर्थिक सहयोग लिइसक्नुभएको छ ।

माता सरस्वतीका पुत्रीहरूमध्येकी प्रतिभाशाली एक सुपुत्री काठमाडौँ बानेश्वरनिवासी प्रसिद्ध साहित्यकार हिरण्यकुमारी पाठकले शब्दयात्रा प्रकाशनद्वारा बनेपामा संस्थापित शब्दयात्रा शारदा मन्दिरका लागि १० हजार रुपियाँ अर्पण गर्नुभएको छ ।
यसै गरी माता सरस्वतीकी प्रतिभाशाली अर्की सुपुत्री ललितपुर सानेपानिवासी प्रसिद्ध साहित्यकार नवीना श्रेष्ठले पनि शब्दयात्रा शारदा मन्दिरका लागि ५ हजार रुपियाँ अर्पण गर्नुभएको छ ।
उहाँहरूको यो उदार सहयोगप्रति हार्दिक आभार प्रकट गर्दै शब्दयात्रा प्रकाशन परिवार उहाँहरूमाथि माता सरस्वतीको कृपादृष्टि सदैव प्राप्त भइरहोस् भन्ने प्रार्थना गर्दछ ।

शब्दयात्रा प्रकाशनको कार्यक्रम ‘कर्मयोद्धासँग शब्दसंवाद’ को १ सय १३ औँ शृङ्खला यही २०७७ साल माघ २ गते शुक्रबार सम्पन्न भयो । संस्थापक अध्यक्ष हरि मञ्जुश्रीको सभापतित्व र आध्यात्मिक प्रवाचक बाबा विश्वनाथको प्रमुख आतिथ्य तथा सहप्राध्यापक रूपनारायण श्रेष्ठको विशेष आतिथ्यमा सम्पन्न उक्त कार्यक्रममा बाबा विश्वनाथबाट आध्यात्मिक प्रवचन तथा भजन–कीर्तन गरिएको थियो । कार्यक्रमको सञ्चालन पण्डित रमेश अधिकारीले गर्नुभएको थियो भने व्यवस्थापन सङ्गीता केसीबाट भएको थियो ।
प्रवचन कार्यक्रममा शब्दयात्रा प्रकाशनका सदस्य र स्थानीय भक्तजन उपस्थित हुनुहुन्थ्यो भने पनौतीबाट एक दर्जन भक्तजनको आगमन भएको थियो ।

शब्दयात्रा प्रकाशनद्वारा प्रकाशित ‘नेपालभूमि’ राष्ट्रिय साप्ताहिक पत्रिकाका स्तम्भकार तथा साहित्यकार डा. दुर्गा दाहालको निधन भएको छ । उहाँ अमेरिकामा बस्न थाल्नुभएको थियो ।
अन्तर्राष्ट्रिय नेपाली साहित्य समाजसँग आबद्ध उहाँले पुरस्कारको पनि स्थापना गर्नुभएको थियो । उहाँले अमेरिकाबाटै ‘नेपालभूमि’ का लागि लेखहरू पठाउने गर्नुभएको थियो ।
शब्दयात्रा प्रकाशन परिवार स्तम्भकार डा. दुर्गा दाहालको निधनप्रति गहिरो दुःख व्यक्त गर्दै शोकसन्तप्त परिवारजनप्रति हार्दिक समवेदना व्यक्त गर्दछ ।

शब्दयात्रा प्रकाशनद्वारा संस्थापित ‘शब्दयात्रा वसन्त शर्मा कविता–काव्य सम्मान’ बाट २०७१ सालमा सम्मानित हुनुभएका अग्रज गीतकार तथा कवि भैरवनाथ रिमाल ‘कदम’ को निधन भएको छ । उहाँको निधन गत शनिबार पुस २५ गते ८६ वर्षको उमेरमा भएको हो ।
भैरवनाथ रिमाल ‘कदम’ को दृश्यमान् स्वरूपको भौतिक विसर्जनबाट व्यथित बनेर शब्दयात्रा प्रकाशनले उहाँलाई सहस्र अश्रुजलबाट मानसिक तर्पण दिएको छ । उहाँका शोकापन्न पारिवारिक सम्बन्धीहरूसमान सहवेदना अनुभूत गरिरहेको शब्दयात्रा प्रकाशन परिवार उहाँको अदृष्ट स्वरूप ब्रह्मलीन होस् भन्ने कामनाका साथ उहाँले गर्नुभएको सारस्वत योगदानप्रति हृदयतः भावपूर्ण शब्दश्रद्धा समर्पण गर्दछ ।

शब्दयात्रा प्रकाशनले बनेपामा निर्माण गरेको शब्दसाधक तीर्थमा गई तस्बिर खिचाउनेहरूको सङ्ख्या अचेल बढिरहेको छ । नेपालका प्रथम शिक्षासेवी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कार पाउने प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत स्वराङ्कन गर्ने प्रथम गायिका मेलवादेवी गुरुङको सालिक रहेको ठाउँलाई शब्दसाधक तीर्थ भनिएको हो ।
कोरोना महामारीको प्रभाव कम हुँदै गएको अनुभव भएकाले र बीपी राजमार्गबाट यात्रा गर्नेहरूले शब्दयात्रा स्तम्भको उज्यालोका कारण सालिकहरू प्रस्ट देख्न सक्ने भएकाले शब्दसाधक तीर्थमा जानेहरूको सङ्ख्या बढ्न थालेको अनुमान गरिएको छ ।
वाङ्मय अन्तर्गत शिक्षा–शिक्षण, आमसञ्चार–पत्रकारिता, विज्ञान–प्रविधि, भाषा–साहित्य र गीत–सङ्गीत क्षेत्रको साझा थलो भएकाले र यी पाँचै विधाका प्रथम व्यक्तित्वको सालिक नेपालमा बनेपामा मात्रै भएकाले यी पाँचै विधालाई माया गर्नेहरूका लागि शब्दसाधक तीर्थ प्रेरणादायक स्थल बनेको छ । सालिकको छेउमा बसेर तस्बिर खिची सामाजिक सन्जालमा राख्ने युवाहरू पनि धेरै देखिन थालेका छन् ।