Shabdayatra Prakashan

विश्वव्यापी रूपमा फैलिएको कोरोना भाइरसका कारण शब्दयात्रा प्रकाशनले विगतका वर्षहरूमा जति काम गर्न सकेन । तैपनि २०७७ साल साउनदेखि २०७८ साल असारसम्म केही कामहरू गरिएका छन् । जस्तै —
— आठवटा पुस्तक प्रकाशन गरी सार्वजनिक गरिएको छ । दुईवटा पुस्तिका पनि प्रकाशन गरिएका छन् ।
— ‘शब्दसञ्चार’ रेडियो कार्यक्रम दुई महिना स्थगित गरी अन्य समयमा नियमित रूपमा सञ्चालन गरिएको छ ।
— हरेक वर्ष समर्पण गरिने विभिन्न विधाका १८ वटा सम्मान समर्पण गरिएका छन् ।
— शब्दयात्रा कर्मशीलता पुरस्कार समर्पण गरिएको छ ।
— द्रोणपुष्प पत्रकारिता छात्रवृत्ति प्रदान गरिएको छ ।
— काभ्रेली पत्रकारद्वयलाई कदरपत्र प्रदान गरिएको छ ।
— अक्षयकोषका लागि तीन लाख रुपियाँ प्राप्त गर्न सकिएको छ ।
— शब्दयात्रा स्तम्भ निर्माण गरी अनावरण गरिएको छ ।
— सालिक स्थापनाका सहयोगीहरूको नामावली रहेको अभिलेख राखिएको छ ।
— सरस्वती मन्दिरको गजुर निर्माण गर्नुका साथै बार बार्ने कार्य सम्पन्न गरिएको छ ।
— सालिक वरिपरि बार थप्ने काम गरी शब्दसाधक तीर्थको बोर्ड राखिएको छ ।
— शब्दयात्रा प्रकाशनको आजीवन सदस्यका रूपमा ६ जनालाई थप गरिएको छ ।
— विभिन्न व्यक्तिहरूबाट शब्दयात्रा प्रकाशन पुस्तकालयका लागि पुस्तकहरू प्राप्त गरेको छ ।
— ‘कर्मयोद्धासँग शब्दसंवाद’ प्रवचन कार्यक्रम अनियमित रूपमै भए पनि अनलाइनबाट सञ्चालन गरिएको छ ।
— शब्दयात्रा प्रकाशनको भक्तपुर सम्पर्क केन्द्र बनाइएको छ । त्यस केन्द्रले प्राञ्जल नेपाल र छन्दकविता मञ्चसँग सहकार्य गरेर अनलाइनबाट नवकवितावाचन कार्यक्रम गरिरहेको छ ।
— राष्ट्रका विशिष्ट व्यक्तित्वहरूलाई शब्दसाधक तीर्थको अवलोकन गराइएको छ ।
— केही पुस्तकालयलाई पुस्तकहरू उपहारस्वरूप प्रदान गरिएका छन् ।
यसबाट कोरोनाको प्रकोप भएको समयमा पनि सुरक्षाका सम्पूर्ण उपायहरू अवलम्बन गरी आवश्यक कार्यहरू सम्पन्न गर्न शब्दयात्रा प्रकाशन सञ्चालक समिति यथासम्भव प्रयत्नरत रहेको देख्न सकिन्छ । यिनै कार्यक्रमहरूलाई निरन्तरता दिँदै विभिन्न जिल्लाका राष्ट्रिय प्रतिभाहरूका लागि पुरस्कार कोषको थप व्यवस्था गर्न पनि सुरु गरिएको छ । यी कार्यक्रम सम्पन्न गर्न सहयोग गर्ने सबै महानुभावमा शब्दयात्रा प्रकाशन हार्दिक आभार व्यक्त गर्दछ ।

यही २०७८ साल असोज ९ गते शनिबार शब्दयात्रा प्रकाशनले दुईजना विशिष्ट व्यक्तित्वलाई पुरस्कार समर्पण गर्न पायो । कवि तथा पूर्वप्रशासक कृष्ण जोशीद्वारा व्यवस्थापित ‘शब्दयात्रा कृष्ण जोशी भोजपुर प्रतिभा पुरस्कार’ प्रा. डा. गोविन्दमानसिंह कार्कीलाई एवं पूर्वप्रशासक तथा कूटनीतिज्ञ सूर्यप्रसाद श्रेष्ठद्वारा व्यवस्थापित ‘शब्दयात्रा कर्मशीलता पुरस्कार’ डा. इन्दुल केसीलाई समर्पण गरियो । पुरस्कारमा अभिवन्दनापत्र, नगद, उपहार तथा शब्दयात्रा पट्ट समर्पण गरिएको थियो । कार्यक्रमका प्रमुख अतिथि सङ्गीतशिल्पी तथा साहित्यकार गणेश रसिक तथा अतिथि पुरस्कारका व्यवस्थापक कवि कृष्ण जोशी र साहित्यकार पवन आलोक हुनुहुन्थ्यो । सम्मान गर्दा उपहार शब्दयात्रा प्रकाशनका सञ्चालक सदस्य हरिगोपाल प्रधानले, शब्दयात्रा पट्ट सभापति हरि मञ्जुश्रीले, रकम व्यवस्थापक कृष्ण जोशीले र अभिवन्दनापत्र प्रमुख अतिथि गणेश रसिकले समर्पण गर्नुभएको थियो । साहित्यकार पवन आलोकले पुरस्कृत व्यक्तित्वको चिनारी गराउनुभएको थियो भने कवि कृष्ण जोशीले कार्यक्रमको समीक्षा गर्दै सभाविसर्जन गर्नुभएको थियो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्वमा सम्पन्न उक्त कार्यक्रमको सञ्चालन ‘शब्दसञ्चार’ रेडियो कार्यक्रमका सञ्चालक शिव बन्जाराले गर्नुभएको थियो । कार्यक्रममा पुरस्कारको अभिवन्दनापत्र वाचन शब्दयात्रा प्रकाशनका सञ्चालक सदस्य कृष्णमणि कुइँकेलले र स्वागत भाषण महाप्रबन्धक शारदाप्रसाद शर्माले गर्नुभएको थियो भने रुद्राक्षको माला शब्दयात्रा प्रकाशनका आजीवन सदस्य नवीना श्रेष्ठले अर्पण गर्नुभएको थियो । शब्दयात्रा प्रकाशनका तर्फबाट प्रमुख अतिथि गणेश रसिक र अतिथि वक्ता पवन आलोकलाई शब्दयात्रा प्रकाशन संरक्षण समितिका सदस्य सकुल थापाले उपहार समर्पण गर्नुभएको थियो । कार्यक्रम अध्यक्ष हरि मञ्जुश्रीको फेसबुकबाट प्रत्यक्ष प्रसारण गरिएको थियो । उक्त कार्यक्रम शब्दयात्रा प्रकाशनको वेबसाइटबाट पनि हेर्न सकिनेछ ।