शब्दयात्रा प्रकाशनद्वारा प्रकाशित दुई पुस्तक सार्वजनिक गरिएका छन् । सार्वजनिक गरिएका पुस्तकहरूमा कवि पदम दाहालद्वारा लिखित कवितासङ्ग्रह ‘श्वेताम्बरी’ र कृष्णप्रसाद भट्टराईद्वारा लिखित ‘विकसित नेपाल सम्पन्न नेपाली’ रहेका छन् । शब्दयात्रा प्रकाशनको सभाकक्ष बनेपामा आयोजित विशेष कार्यक्रममा प्रमुख अतिथिका रूपबाट माननीय प्रमुख निर्वाचन आयुक्त दिनेशकुमार थपलियाले दुवै पुस्तकलाई थैलीबाट झिकेर सार्वजनिक गरिदिनुभएको थियो । ‘श्वेताम्बरी’ लाई साहित्यकार प्रेमा उदासले र ‘विकसित नेपाल सम्पन्न नेपाली’ लाई प्रा. केदारनाथ श्रेष्ठले पनि साथसाथै सार्वजनिक गरिदिनुभएको थियो । ‘श्वेताम्बरी’ का विषयमा समालोचक प्रा. डा. कृष्णप्रसाद दाहालले र ‘विकसित नेपाल सम्पन्न नेपाली’ का विषयमा समालोचक डा. श्याम भट्टराईले समीक्षा गर्नुभएको थियो । कार्यक्रममा कृतिकार पदम दाहालले ‘श्वेताम्बरी’ भित्रको एउटा कविता वाचन गर्नुभएको थियो ।

शब्दयात्रा प्रकाशनको आयोजनामा यही २०७८ साल पुस २४ गते शनिबार विशेष साहित्यिक कार्यक्रमको आयोजना गरियो । माननीय प्रमुख निर्वाचन आयुक्त दिनेशकुमार थपलियाको प्रमुख आतिथ्यमा सम्पन्न उक्त कार्यक्रमको सभापतित्व शब्दयात्रा प्रकाशनका संस्थापक अध्यक्ष हरि मञ्जुश्रीले गर्नुभएको थियो । शब्दयात्रा प्रकाशनको सभाकक्षमा आयोजित उक्त कार्यक्रममा मञ्चस्थ महानुभावहरूलाई शब्दयात्रा प्रकाशनका आजीवन सदस्य पुण्यवती घलेले रुद्राक्षको माला लगाइदिनुभएको थियो भने प्रमुख अतिथिलाई शिक्षासेवी पूर्णबहादुर कर्माचार्यले शब्दयात्रा प्रकाशनका तर्फबाट उपहार समर्पण गर्नुभएको थियो । उक्त कार्यक्रममा शब्दयात्रा प्रकाशनद्वारा संस्थापित तथा गीतकार लीला श्रेष्ठद्वारा व्यवस्थापित ‘शब्दयात्रा केदारनाथ — लीला श्रेष्ठ सङ्खुवासभा प्रतिभा पुरस्कार, २०७८’ समर्पण गरिएको थियो भने शब्दयात्रा प्रकाशनद्वारा प्रकाशित तथा पदम दाहालद्वारा लिखित ‘श्वेताम्बरी’ नामक कवितासङ्ग्रह र कृष्णप्रसाद भट्टराईद्वारा लिखित ‘विकसित नेपाल सम्पन्न नेपाली’ नामक पुस्तकलाई सार्वजनिक गरिएको थियो । उक्त समारोहमा नै शब्दयात्रा प्रकाशनले बागमती फार्मेसीसँग सम्झौता गरेको थियो भने शब्दयात्रा प्रकाशन पुस्तकालयलाई केही पुस्तकहरू उपहारस्वरूप प्रदान गरिएको थियो । कार्यक्रमको सञ्चालन शब्दयात्रा प्रकाशन काभ्रेपलान्चोक सम्पर्क केन्द्रका संयोजक साधुराम गिरीले गर्नुभएको थियो भने कार्यक्रमको समीक्षा गर्दै समापन शिक्षासेवी माधवप्रसाद आचार्यले गर्नुभएको थियो । शब्दयात्रा प्रकाशनका कार्यालय व्यवस्थापक सङ्गीता केसीले सामग्रीहरूको व्यवस्थापन गर्नुभएको उक्त कार्यक्रमको छायाङ्कन तथा अभिलेखाङ्कन सफ्टवेयर इन्जिनियर रोशन मञ्जुश्री अधिकारीबाट गरिएको थियो । उक्त कार्यक्रममा शब्दयात्रा प्रकाशनका आजीवन सदस्यहरू केदारनाथ तिमिल्सिना र सहदीप पलान्चोके आदिसहित उद्धवप्रसाद नेपाल, लोकमान मास्के, प्रजापति तिमिल्सिना, लालबहादुर भुजेल, श्री शर्मा मूर्ख लगायतका विद्वतवर्ग समुपस्थित हुनुहुन्थ्यो ।

माननीय प्रमुख निर्वाचन आयुक्त दिनेशकुमार थपलियाले शब्दयात्रा प्रकाशनद्वारा निर्मित शब्दसाधकका सालिकहरू, शब्दयात्रा स्तम्भ, शब्दयात्रा शारदा मन्दिर, शब्दयात्रा प्रकाशन पुस्तकालय, शब्दयात्रा प्रकाशनको कार्यालय आदिको अवलोकन गर्नुभएको छ । उहाँका साथमा शब्दसाधक तीर्थको अवलोकन गर्नेहरूमा राष्ट्रका सम्मानित व्यक्तित्वहरू साहित्यकार ज्ञान उदास, समालोचक प्रा. डा. कृष्णप्रसाद दाहाल, कवि लोकमान मास्के, अन्वेषक लालबहादुर भुजेल आदि पनि हुनुहुन्थ्यो ।

शब्दयात्रा प्रकाशनले आफ्नो १ सय ६५ औँ प्रकाशनपुष्पका रूपमा प्रकाशित ‘जनताका साथी’ नामक शशिधर तिमिल्सिना स्मृतिग्रन्थलाई सार्वजनिक गराएको छ । शब्दयात्रा प्रकाशनका संस्थापक अध्यक्ष हरि मञ्जुश्रीले सम्पादन गर्नुभएको उक्त स्मृतिग्रन्थलाई प्रमुख अतिथिद्वय राष्ट्रिय समावेशी आयोगका माननीय अध्यक्ष डा. रामकृष्ण तिमल्सेना र पूर्वमन्त्री केशव बडाल तथा अतिथि शिक्षासेवी रामप्रसाद अधिकारीले संयुक्त रूपबाट सार्वजनिक गरिदिनुभएको थियो । ‘जनताका साथी’ नामक शशिधर तिमिल्सिना स्मृतिग्रन्थ हरि मञ्जुश्रीको १ सय ३२ औँ पुस्तक हो ।
‘जनताका साथी’ नामक शशिधर तिमिल्सिना स्मृतिग्रन्थमा शशिधर तिमिल्सिनाका बारेमा केशव बडाल, शिवबहादुर देउजा, रामहरि सुवेदी र टीपी शर्माका साथमा ऋषि ‘निर्दोष’, कमलप्रसाद तिमिल्सिना, कृष्णप्रसाद खनाल, खड्ग खरेल, गङ्गा लुइटेल, चन्द्रमणि तिमिल्सिना, नवराज तिमिल्सिना, नारायणप्रसाद तिमिल्सिना, भवानीशङ्कर तिमिल्सिना, शालिग्राम तिमिल्सिना, बद्री तिमिल्सिना, बद्रीप्रसाद ढुङ्गाना, भैरव केसी, यादव हुमागाई, रामकृष्ण तिमिल्सिना, विजयराज पौड्याल, विमला शर्मा अधिकारी र शम्भुप्रसाद तिमिल्सिनाका लेख, संस्मरण र कविताहरू सङ्कलित छन् । तीबाहेक शशिधर तिमिल्सिनाको पारिवारिक विवरण, शशिधर तिमिल्सिनासम्बन्धी पूर्वप्रकाशन, कागजात र तस्बिरहरू राखिएका छन् ।
स्मृतिग्रन्थ र शशिधर तिमिल्सिनाका विषयमा केशव बडाल, शिवबहादुर देउजा, प्रेमबहादुर तिमिल्सिना, विजयराज पौड्याल र बद्री तिमिल्सिनाले मन्तव्य व्यक्त गर्नुभएको उक्त समारोहको टिप्पणीसहित विसर्जन नमोबुद्ध नगरपालिकाका प्रमुख टीपी शर्मा तिमिल्सिनाले र प्रमुख अतिथिलाई शब्दयात्रा प्रकाशनका तर्फबाट उपहार समर्पण चन्द्रबहादुर खड्काले गर्नुभएको थियो । समारोहको सभापतित्व शब्दयात्रा प्रकाशनका संस्थापक अध्यक्ष हरि मञ्जुश्रीले, सञ्चालन शब्दयात्रा प्रकाशन काभ्रेपलान्चोक सम्पर्क केन्द्रका संयोजक साधुराम गिरी र शिक्षासेवी बद्री तिमिल्सिनाले, स्वस्तिवाचन तपोधन कुइकेलले, मञ्चस्थ महानुभावहरूलाई गलबन्दी अर्पण अमृत अधिकारी र प्रकृति प्याकुरेलले एवं अन्य व्यवस्थापन सङ्गीता केसी र दीपक तिमिल्सिनाले गर्नुभएको थियो । उपस्थित सम्पूर्ण महानुभावहरूलाई स्मृतिग्रन्थ निःशुल्क वितरण गरिएको थियो ।
समारोहमा धुलिखेल नगरपालिकाका उपमेयर विमला शर्मा, गीतिभास्कर मच्छेश्वर सापकोटा, केदारनाथ तिमिल्सिना, डा. इन्दुल केसी, शिव बन्जारा, शकुन्तला बन्जारा, पदम दाहाल, सुनील सापकोटा, चूडाप्रसाद चौलागाई, पूर्णबहादुर कार्की आदिलगायत राजनीतिकर्मी, शिक्षासेवी, समाजसेवी, पत्रकार आदिको बाक्लो उपस्थिति थियो । कार्यक्रमलाई सफ्टवेयर इन्जिनियर रोशन मञ्जुश्री अधिकारीले लाइभ प्रसारण गराउनुभएको थियो ।