शब्दयात्रा प्रकाशनको साप्ताहिक कार्यक्रम ‘कर्मयोद्धासँग शब्दसंवाद’ को १०० औँ शृङ्खला गत २०७६ साल कार्तिक १ गते शुक्रबार शब्दयात्रा प्रकाशनको सभाकक्षमा गीतिभास्कर मच्छेश्वर सापकोटाको सभापतित्व र लेखक डा. इन्दुल केसीको प्रमुख आतिथ्यमा सम्पन्न भयो । शब्दयात्रा प्रकाशन पुस्तकालय व्यवस्थापन समितिका सदस्य ज्यो. पं. रमेश अधिकारीकी माता नानु अधिकारीको देहावसान भएकोमा उहाँको आत्माको चिरशान्तिको कामना गर्दै १ मिनेट मौनधारण गरी प्रारम्भ भएको उक्त कार्यक्रममा प्रकाशन संस्थाहरूको वितरण सन्जालको आवश्यकताका बारेमा विचार–विमर्श भएको थियो ।
शब्दयात्रा प्रकाशनका अध्यक्ष हरि मञ्जुश्रीले उपस्थित सबैलाई स्वागत गर्दै कार्यक्रमको उद्देश्य बताएपछि वक्ताहरू कवि पदम दाहाल, कवि केदारनाथ तिमल्सिना, कवि चन्द्रमान सुवाल, कवयित्री पुण्यवती घले, लेखक दामोदर घिमिरे र शिक्षासेवी देवीप्रसाद ढुङ्गानाले प्रभावकारी ढङ्गले पुस्तकको वितरण कसरी गर्न सकिन्छ भन्ने विषयमा आआफ्नो राय प्रस्तुत गर्नुभएको थियो । कार्यक्रममा ‘नेपालभूमि राष्ट्रिय साप्तहिक’ का बजार व्यवस्थापक सङ्गीता केसी, व्यवस्थापनविद् श्री शर्मा मूर्ख, नवराज पराजुली, छविलाल कुइँकेल आदिको पनि उपस्थिति रहेको थियो ।
‘शब्दसंवाद’ मा पुस्तक वितरणको चर्चा
