शब्दयात्रा प्रकाशनको आयोजनामा गत भदौ २८ गते बनेपा नगरपालिकाको सभाकक्षमा सम्पन्न कलाकार भेलाले ‘शब्दयात्रा कलाकार समाज’ को गठन गर्ने निर्णय गरेको छ ।
नौ सदस्यीय उक्त शब्दयात्रा कलाकार समाजमा हरि कर्माचार्य संयोजक तथा शर्मिला श्रेष्ठ, मुकुन्द थापा, रामहरि न्यौपाने, भुवन रायमाझी, विनोद बन्जारा, रामशरण हुमागाई, गोकुल राउत र विशाल काल्तान सदस्य रहनुभएको छ ।
अग्रज कलाकर्मीहरू पङ्कज चित्रकार, मच्छेश्वर सापकोटा र भूषण भोमि श्रेष्ठको आतिथ्य, शब्दयात्रा प्रकाशनका अध्यक्ष साहित्यकार तथा गन्थसम्पादक हरि मञ्जुश्रीको सभापतित्व र गायक–सङ्गीतकार हरि कर्माचार्यको संयोजकत्वमा सम्पन्न भएको उक्त कार्यक्रममा स्वागत मन्तव्य रामहरि न्यौपानेले र कार्यक्रम सञ्चालन भुवन रायमाझीले गर्नुभएको थियो ।
भेलामा कलाका विभिन्न विधामा सक्रिय रहेका झन्डै एक सय जनाजति काभ्रेली कलाकारहरूको सहभागिता रहेको थियो ।
उक्त भेलाले ‘राष्ट्रिय काभ्रेली कलाकार सङ्घ’ को पनि गठन गरी हरि कर्माचार्यको अध्यक्षतामा सङ्घको २५ सदस्यीय तदर्थ समितिसमेत बनाएको छ । सङ्घको संरक्षकमा हरिवंश आचार्यलाई र सल्लाहकारमा पङ्कज चित्रकार, भूषण भोमि श्रेष्ठ, मच्छेश्वर सापकोटा, सुरेश अधिकारी र चन्द्रकुमार दोङलाई चयन गरिएको छ ।
