आज सार्वजनिक गरिएका पुस्तकहरूका बारेमा चिनारी गराइदिन मलाई आग्रह गरिएको छ । त्यसैले म त्यही विषयमा केन्द्रित हुन चाहन्छु ।
आज सार्वजनिक गरिएको पहिलो पुस्तक ‘कर्मयोद्धासँग शब्दसंवाद’ हो । यो पुस्तक शब्दयात्रा प्रकाशनबाट प्रकाशित १०१ औँ पुस्तक हो । शब्दयात्रा प्रकाशनले गत वर्ष सञ्चालन गरेको ‘कर्मयोद्धासँग शब्दसंवाद’ नामक कार्यक्रममा विभिन्न कर्मयोद्धाहरूले व्यक्त गरेका विचारहरू लेखका रूपमा यसमा समेटिएका छन् । यी लेखहरू पदमनाथ ढुङ्गानाले लेखेर ‘नेपालभूमि राष्ट्रिय साप्ताहिक’ मा प्रकाशन गराउनुभएको थियो । तिनै लेखहरूलाई गीता मञ्जुश्री र दामोदर घिमिरेले सङ्कलन र सम्पादन गरी यो पुस्तक तयार पार्नुभएको हो । जम्मा २ सय ३२ पृष्ठको यस पुस्तकमा ५० जना कर्मयोद्धाहरूको चिनारी, चिन्तन र तस्बिर राखिएको छ । यस कृतिका लागि लेखक र सम्पादकहरूलाई बधाई छ ।
आज सार्वजनिक गरिएको दोस्रो पुस्तक ‘परेली’ नामक कथासङ्ग्रह हो । यो पुस्तक शब्दयात्रा प्रकाशनबाट प्रकाशित १०२ औँ पुस्तक हो । यसका कथाकार सरस्वती शर्मा सुवेदी हुनुहुन्छ । शब्दयात्रा प्रकाशनले यसअघि उहाँको कवितासङ्ग्रह ‘पानी मनकी रानी’ नामक कवितासङ्ग्रह पनि प्रकाशित गरिदिएको थियो । उहाँको यो दोस्रो साहित्यिक कृति हो । जम्मा ९६ पृष्ठको यस पुस्तकमा १६ वटा पारिवारिक कथा रहेका छन् । यस कृतिका लागि कृतिकारलाई बधाई छ ।
आज सार्वजनिक गरिएको तेस्रो पुस्तक ‘अक्षरहरूको बिस्कुन’ नामक कवितासङ्ग्रह हो । यो पुस्तक शब्दयात्रा प्रकाशनबाट प्रकाशित १०३ औँ पुस्तक हो । यसका कृतिकार डा. हेमराज काफ्ले हुनुहुन्छ । उहाँ नेपाली र अङ्ग्रेजी दुवै भाषामा सिर्जना गर्नुहुन्छ । यसअघि अङ्ग्रेजी भाषामा उहाँका दुईवटा कृति प्रकाशित भइसकेका छन् । यो उहाँको तेस्रो र नेपाली भाषामा प्रकाशित पहिलो कृति हो । जम्मा ९६ पृष्ठको यस सङ्ग्रहमा ६७ वटा कविता रहेका छन् । यस कृतिका लागि कृतिकारलाई बधाई छ ।
अन्त्यमा, आज सार्वजनिक गरिएका तीनैवटा कृतिले नेपाली भाषा–साहित्यमा विशेष स्थान राख्नेछन् भन्ने विश्वास व्यक्त गर्दै कृतिहरूको परिचय गराइदिन मलाई गरिएको आग्रहका लागि शब्दयात्रा प्रकाशनप्रति हार्दिक आभार व्यक्त गर्दछु ।
(कार्यक्रममा अभिव्यक्त परिचयात्मक टिप्पणी)