सार्वजनिक गरिएका पुस्तकहरूमध्ये तीनवटा पुस्तकका बारेमा चिनारी गराइदिन मलाई आग्रह गरिएको हुनाले म पुस्तककै विषयमा प्रवेश गर्न चाहन्छु ।
पहिलो पुस्तक आध्यात्मिक लेखक ओतबहादुर खड्काद्वारा अनूदित तथा सम्पादित ‘वेद के भन्छ ?’ नामक पुस्तिका हो । शब्दयात्रा प्रकाशनद्वारा प्रकाशित यो १ सय २७ औँ प्रकाशनपुष्प हो । प्रकाशकीय लेख्ता हरि मञ्जुश्रीले यस पुस्तिकाको अध्ययनबाट हजारौँ वर्षपहिलेका हाम्रा पूर्वजहरूको चिन्तन–मननको स्तर कति माथि रहेछ, विश्वकल्याणको उदात्त भावना कसरी जागरण भएको रहेछ, ईश्वरसँग साक्षात्कार र संवाद कसरी हुँदो रहेछ भन्ने कुरा थाहा पाउन सकिन्छ र हामीले आफूलाई भौतिक विधाका विभिन्न क्षेत्रमा विकसित बनेको मानेर उत्तरआधुनिक भइसकेको ठाने पनि हाम्रा पूर्वजहरूको चिन्तनको स्तरभन्दा हाम्रो चिन्तनको स्तर कति तल रहेछ भनेर पनि स्पष्ट बुझ्न सकिन्छ भनेर लेख्नुभएको छ । जम्मा ४८ पृष्ठको यस पुस्तकको मूल्य ६० रुपियाँ राखिएको छ ।
दोस्रो पुस्तक नवीना श्रेष्ठद्वारा नेपाल भाषाबाट अनूदित तथा सम्पादित ‘श्रीस्वस्थानी व्रतकथा’ हो । शब्दयात्रा प्रकाशनद्वारा प्रकाशित यो १ सय २८ औँ प्रकाशनपुष्प हो । ‘प्रकाशकीय’ मा हरि मञ्जुश्रीले लेखेअनुसार यो पुस्तक अहिलेसम्म नेपाली भाषामा प्रकाशन गरिएका ‘श्रीस्वस्थानी व्रतकथा’ भन्दा केही भिन्न देखिन्छ । ‘श्रीस्वस्थानी व्रतकथा’ का प्रायः पुस्तकहरू या त भारतको बनारसबाट छापिएर आएका हुन्थे या तिनै पुस्तकलाई केही परिमार्जित गरेर नेपालबाट छापिएका हुन्थे । यो नेपाल भाषामा प्राप्त ‘थ्यासफू’ का आधारमा साहित्यकार पशुपतिमान पःमाँले नेपाल भाषामा तयार पार्नुभएको ‘श्रीस्वस्थानी व्रतकथा’ र स्व. किलबहादुर भुजी श्रेष्ठले उतार गरी राखेको ‘श्रीस्वस्थानी व्रतकथा’ लाई नेपाली भाषामा अनुवाद गरी दुवै पुस्तकलाई समायोजन गरेर तयार पारिएको हो । त्यसैले यो पुस्तक पढ्दा पाशुपत क्षेत्रको कथा पढेजस्तो लाग्छ र नेपालको मौलिक ‘श्रीस्वस्थानी व्रतकथा’ यही हो भन्न सकिन्छ । जम्मा २ सय ४८ पृष्ठको यस पुस्तकको मूल्य ५०० रुपियाँ राखिएको छ ।
तेस्रो पुस्तक केदारनाथ तिमल्सिनाद्वारा लिखित ‘स्पेनको यात्रा नामक यात्रासंस्मरण हो । शब्दयात्रा प्रकाशनद्वारा प्रकाशित यो १ सय २९ औँ प्रकाशनपुष्प हो । युरोप महादेशमा पर्ने स्पेन देशका केही सहरहरूमा भ्रमण गर्ने मौका पाएका बेला देखेका, थाहा पाएका र अनुभव गरेका कुराहरूलाई लिपिबद्ध गरी केदारनाथ तिमल्सिनाले तयार पारेको पुस्तिका ‘स्पेनको यात्रा’ मा सरल शैलीमा रोचक घटनाहरू प्रस्तुत भएका छन् । छोटो भए पनि नयाँ जानकारीहरू दिन, थोरै कुरामा धेरै कुराहरू थाहा दिन, अनि स्पेनका केही स्थान, प्राकृतिकता, सामाजिकता, विकास–निर्माण, प्रचलन आदिका विषयमा रोचक ढङ्गमा प्रस्तुत गर्न यो पुस्तिका सफल रहेको छ भनेर ‘प्रकाशकीय’ मा हरि मञ्जुश्रीले लेख्नुभएको छ । जम्मा ४० पृष्ठको यस पुस्तिकाको मूल्य ६० रुपियाँ राखिएको छ ।
आज सार्वजनिक गरिएका यी तीनैवटा पुस्तकले नेपाली समाजमा सकारात्मक छाप छोड्नेछन् भन्ने आशा गर्दै तीनैजना अक्षरसेवीलाई हार्दिक बधाई ज्ञापन गर्दछु । (परिचयात्मक टिप्पणीकारका रूपमा अभिव्यक्त मन्तव्यको अंश)
तीन पुस्तकका तीन विशेषता
