शब्दयात्रा प्रकाशनले साहित्यसेवी अरुणबहादुर खत्री ‘नदी’ (तनहूँ) लाई २०८३ सालको ‘शब्दयात्रा सूर्यप्रसाद श्रेष्ठ कर्मशीलता पुरस्कार’ समर्पण गर्ने भएको छ । सरकारी सेवामा रही तीन दशकसम्म कार्य गर्नुभएका उहाँले विभिन्न पुस्तकहरूको समीक्षा गरेर, विभिन्न स्रष्टाहरूको जीवनी लेखेर, विभिन्न विधामा साहित्यिक सिर्जना गरेर साढे चार दशक अघिदेखि निरन्तर कर्मशील रही वाङ्मयसेवा गरिरहनुभएको छ । उहाँको यही कर्मशीलताका लागि उहाँलाई पुरस्कृत गर्न लागिएको हो । पुरस्कार यही साउन १६ गते शनिबार समर्पण गरिनेछ । यस सम्मानको कोष व्यवस्थापन पूर्वप्रशासक तथा कूटनीतिज्ञ सूर्यप्रसाद श्रेष्ठले गर्नुभएको हो । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन अरुणबहादुर खत्री ‘नदी’ प्रति हार्दिक आभार प्रकट गर्दछ ।