शब्दयात्रा प्रकाशनले समाजसेवी पासाङ दोर्ची शेर्पा (भोजपुर) लाई २०८३ सालको ‘शब्दयात्रा कृष्ण जोशी भोजपुर प्रतिभा पुरस्कार’ समर्पण गर्ने भएको छ । उहाँले आफ्नो जन्मजिल्ला भोजपुरका जनताको स्वास्थ्यस्थितिप्रति संवेदनशील बन्दै भोजपुर जिल्लाका विभिन्न गाउँहरूमा काठमाडौँ र अन्य ठाउँदेखि चिकित्सक र परिचारिकाहरूको टोली पटकपटक लगेर निःशुल्क स्वास्थ्य शिविरहरू सञ्चालन गरी विशेषतः आँखाका रोगी विपन्न नागरिकको लामो समयदेखि सेवा गर्दै आउनुभएको छ । काठमाडौँमा रहेका भोजपुरेहरूलाई सङ्गठित गरेर तिनीहरूलाई भोजपुर जिल्लाको हितमा उपयोग गराउनमा पनि उहाँको अहम् भूमिका रहेको छ । उहाँको यही योगदानका लागि उहाँलाई पुरस्कृत गर्न लागिएको हो । पुरस्कार यही साउन १६ गते शनिबार समर्पण गरिनेछ । यस सम्मानको कोष व्यवस्थापन पूर्वप्रशासक तथा कवि कृष्ण जोशीले आफू जीवित छँदै गर्नुभएको हो । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन पासाङ दोर्ची शेर्पाप्रति हार्दिक आभार प्रकट गर्दछ ।