शब्दयात्रा प्रकाशनले २०८१ सालको ‘शब्दयात्रा वसन्त शर्मा कविता–काव्य सम्मान’ महाकाव्यकार माधव वियोगी (कास्की) मा समर्पण गर्ने भएको छ । शब्दयात्रा प्रकाशनद्वारा गठित सम्मान्य व्यक्तित्व चयन समितिको बैठकले उहाँलाई सम्मान गर्ने निर्णय गरेको हो । उहाँका ९ वटा महाकाव्य र ८ वटा खण्डकाव्यसहित ४१ वटा कृति प्रकाशित छन् । उहाँले छन्द बचाऊँ र महाकाव्यलेखन अभियान चलाउनुभएको छ । उहाँजस्ता साधकमा सम्मान समर्पण गर्न पाउनु शब्दयात्रा प्रकाशनको सौभाग्य हो । यस सम्मानको कोष व्यवस्थापन कवि कविप्रसाद प्याकुरेल (काभ्रेपलाञ्चोक) ले गर्नुभएको हो । सम्मान आगामी चैत महिनामा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा माधव वियोगीप्रति शब्दयात्रा प्रकाशन परिवार हार्दिक आभार प्रकट गर्दछ ।