शब्दयात्रा प्रकाशनले भोजपुर जिल्लामा जन्मेर भोजपुर जिल्लाको शैक्षिक क्षेत्रमा र शिक्षा विधामा अनुसन्धान गर्ने अनुसन्धातालाई विद्वत्वृत्ति समर्पण गर्ने भएको छ । विद्वत्वृत्ति हरेक वर्ष समर्पण गर्ने र विद्वत्वृत्ति समर्पण गर्दा १० हजार रुपियाँ, रुद्राक्षको माला र प्रमाणपत्र समर्पण गरिने भएको छ । विद्वत्वृत्तिको नाउँ ‘शब्दयात्रा प्राध्यापक केदारनाथ — लीला श्रेष्ठ भोजपुर अनुसन्धान विद्वत्वृत्ति’ राखिएको छ । विद्वत्वृत्तिको आर्थिक व्यवस्थापन प्राध्यापक केदारनाथ श्रेष्ठले गर्नुभएको छ । त्यसका लागि उहाँले शब्दयात्रा प्रकाशनलाई २ लाख २ हजार २ रुपियाँ र त्यस रकमको ब्याज जम्मा हुने बचत खाता खोल्न १ हजार रुपियाँ उपलब्ध गराउनुभएको छ । यसका लागि शब्दयात्रा प्रकाशन र प्राध्यापक केदारनाथ श्रेष्ठका बीच गरिएको सम्झौतापत्रमा हस्ताक्षर भइसकेको छ । सम्झौतापत्रमा आर्थिक व्यवस्थापकका तर्फबाट स्वयं प्राध्यापक केदारनाथ श्रेष्ठले र शब्दयात्रा प्रकाशनका तर्फबाट आजीवन सदस्य श्रीमती रश्मि हुमागाईंले हस्ताक्षर गर्नुभएको छ ।

नेपालका प्रथम शिक्षासेवी आबाल ब्रह्मचारी षडानन्द अधिकारी, प्रथम लोकतान्त्रिक पत्रकार देवीप्रसाद सापकोटा, राष्ट्रिय पुरस्कार पाउने प्रथम वैज्ञानिक नरबहादुर भारती, प्रथम साहित्यिक सहिद कृष्णलाल अधिकारी र गीत स्वराङ्कन गर्ने प्रथम गायिका मेलवादेवी गुरुङका सालिकहरू एकै ठाउँमा स्थापना गरिएको नेपालको एक मात्र शब्दसाधक तीर्थको अवलोकन गर्न बनेपामा आउने शब्दयात्रीहरूको सङ्ख्या बढ्दै गएको छ । शब्दयात्रा प्रकाशनले स्थापना गरेको उक्त शब्दसाधक तीर्थमा रहेका सालिकहरू हेर्न र सालिकसँग बसेर फोटो खिच्न शनिबारको दिन त्यहाँ धेरै मान्छेहरू पुग्न थालेका छन् । गत मङ्सिर १८ गते शनिबार पनि त्यहाँ भीड लागेको थियो । त्यस दिन शब्दसाधक तीर्थको अवलोकन गर्न आउनेहरूमा नारायणप्रसाद वैद्य, सरस्वती वैद्य, मोहनवरसिंह प्रधान, नन्दिका प्रधान, शेषा कर्माचार्य, सफू श्रेष्ठ, श्रद्धा श्रेष्ठ आदि धेरैजना हुनुहुन्थ्यो ।

शब्दयात्रा प्रकाशन पुस्तकालयलाई कवि हरिप्रसाद चौलागाईं, आध्यात्मिक लेखक उद्धवप्रसाद भट्टराई र साहित्यकार तथा समालोचक डा. श्याम भट्टराईले केही पुस्तकहरू उपहार प्रदान गर्नुभएको छ । प्रदान गरिएका पुस्तकहरू शब्दयात्रा प्रकाशन पुस्तकालयका तर्फबाट सङ्गीता केसीले ग्रहण गर्नुभएको थियो ।

शब्दयात्रा प्रकाशनका आजीवन सदस्य लक्ष्मी बडाललाई मातृशोक परेको छ । उहाँकी माता देवकुमारी पोखरेलको केही दिनअघि देहावसान भएको थियो । शब्दयात्रा प्रकाशन परिवार लक्ष्मी बडाल लगायत शोकसन्तप्त परिवारजनप्रति हार्दिक समवेदना व्यक्त गर्दै गतात्माको मोक्षप्राप्तिका लागि भगवानसँग प्रार्थना गर्दछ ।

शब्दयात्रा प्रकाशन परिवार

शिक्षासेवी प्राध्यापक केदारनाथ श्रेष्ठले शब्दयात्रा प्रकाशनको आजीवन सदस्यता ग्रहण गर्नुभएको छ । भोजपुरमा जन्मेर लामो समयसम्म प्राध्यापन गर्नुभएका प्रा. केदारनाथ श्रेष्ठ हाल पेप्सिकोला काठमाडौँमा अवकाशप्राप्त जीवन बिताइरहनुभएको छ । शब्दयात्रा प्रकाशनका संस्थापक अध्यक्ष हरि मञ्जुश्रीबाट उहाँले आजीवन सदस्यता ग्रहण गर्नुभएको हो ।

शब्दयात्रा प्रकाशन काभ्रेपलान्चोक सम्पर्क केन्द्रले सञ्चालन गर्न प्रारम्भ गरेको ‘कर्मयोद्धासँग शब्दसंवाद’ कार्यक्रमको पहिलो शृङ्खलामा शब्दयात्रा प्रकाशनका आजीवन सदस्य तथा ‘शब्दसञ्चार’ रेडियो कार्यक्रमका प्रस्तोता शिव बन्जाराले योगका विषयमा प्रवचन गर्नुभएको छ । कार्यक्रमको सञ्चालन सम्पर्क केन्द्रका संयोजक साधुराम गिरीले गर्नुभएको थियो ।