Shabdayatra Prakashan

शब्दयात्रा प्रकाशनको आयोजनामा गत आइतबार २३ गते श्रीपञ्चमीका दिन ‘अशोकचन्द्र धुँजूका लेखहरू’ नामक लेखसङ्ग्रहलाई सार्वजनिक गरियो । शब्दयात्रा प्रकाशनका संस्थापक अध्यक्ष हरि मञ्जुश्रीको सभापतित्व र काठमाडौँ विश्वविद्यालय केन्द्रीय पुस्तकालयका प्रमुख शेखरप्रसाद ढुङ्गानाको प्रमुख आतिथ्यमा सम्पन्न उक्त कार्यक्रममा सभापति, प्रमुख अतिथि र कृतिकारले संयुक्त रूपमा पुस्तक सार्वजनिक गर्नुभएको थियो । शब्दयात्रा प्रकाशनले पुस्तक सार्वजनिक गर्दा नेपालको मौलिक सम्पदा लोप नहोस् भन्ने उद्देश्यले थैलीमा राखिएको पुस्तकलाई थैलीबाट झिकेर सार्वजनिक गर्ने गरेको छ । सभापतिका रूपबाट हरि मञ्जुश्रीले स्वागत मन्तव्यका साथै शब्दयात्रा प्रकाशन र कार्यक्रमका विषयमा जानकारी गराउनुभएको उक्त कार्यक्रममा कृतिकार अशोकचन्द्र धँुजूको परिचय गराई पुस्तकको विशेषताका बारेमा सम्पादक शिव बन्जाराले जानकारी दिनुभएको थियो भने कृतिकार अशोकचन्द्र धुँजूले मन्तव्य व्यक्त गर्नुभएको थियो । मञ्चस्थ व्यक्तित्वलाई शब्दयात्रा प्रकाशनका आजीवन सदस्य अमृत अधिकारीले माला लगाइदिएर स्वागत गर्नुभएको उक्त कार्यक्रमको सञ्चालन शब्दयात्रा प्रकाशन काभ्रेपलान्चोक सम्पर्क केन्द्रका संयोजक साधुराम गिरीले र शब्दयात्रा प्रकाशनका तर्फबाट प्रमुख अतिथिलाई उपहार समर्पण दामोदर घिमिरेले गर्नुभएको थियो । शब्दयात्रा प्रकाशनको कार्यक्रम विसर्जन गर्दा समीक्षाका साथ विसर्जन गर्ने प्रचलन भएकाले कार्यक्रमको समीक्षा गरी पूर्वप्रशासक तथा लेखक डा. इन्दुल केसीले सभा समापन भएको घोषणा गर्नुभएको थियो । कार्यक्रममा कवयित्री पुण्यवती घले, लेखक पूर्णबहादुर कर्माचार्य, श्रीखण्डपुर माध्यमिक विद्यालयका पूर्वप्रधानाध्यापक जयराम श्रेष्ठ आदिको पनि उपस्थिति थियो ।  

शब्दयात्रा प्रकाशन, भक्तपुर सम्पर्क केन्द्र तथा प्राञ्जल नेपालको आयोजना तथा छन्द कविता मञ्चको संयोजनमा प्रत्येक महिनाको दोस्रो र चौथो शनिबार सञ्चालन हुने गरेको नवकविता वाचन कार्यक्रमको सातौँ शृङ्खला ‘नारी विशेष शृङ्खला’ का रूपमा माघ २२ गते शनिबार सम्पन्न भयो । भर्चुअल रूपमा जुमका माध्यमबाट सञ्चालन भएको सातौँ शृङ्खलामा तेह्रजना कवयित्रीहरूले विविध प्रकृतिका कविता वाचन गर्नुभएको थियो । शब्दयात्रा प्रकाशनका संस्थापक अध्यक्ष हरि मञ्जुश्रीको प्रमुख आतिथ्य तथा डा. इन्दुल केसीको सभापतित्वमा सम्पन्न सो कार्यक्रमको सञ्चालन छन्द कविता मञ्चका संयोजक जीवनाथ अधिकारीले गर्नुभएको थियो भने सुनसरीबाट कवयित्री विमला पोखरेलले वाचित कविताहरूको समीक्षात्मक टिप्पणी गर्नुभएको थियो । कविता वाचन गर्ने कवयित्रीहरू गीता मञ्जुश्री काभ्रेपलान्चोक, टीका श्रेष्ठ खोटाङ, नवीना श्रेष्ठ ललितपुर, निर्मला श्रेष्ठ काभ्रेपलान्चोक, पुण्यवती घले काभ्रेपलान्चोक, बासमती राना थारू कञ्चनपुर, बिरजा घिमिरे काठमाडौँ, लक्ष्मी तिवारी ढकाल स्याङ्जा, लक्ष्मी बडाल काभ्रेपलान्चोक, रश्मि अधिकारी हुमागाई भक्तपुर, शर्मिला पौडेल सिन्धुपाल्चोक, सीता सुवेदी पन्थी भक्तपुर तथा सुन्दरी घिमिरे खतिवडा सङ्खुवासभा हुनुहुन्थ्यो । कार्यक्रममा आगामी कार्यक्रम फागुन १४ गते शनिबार हुने जानकारी दिइएको थियो ।

शब्दयात्रा प्रकाशनको काभ्रेपलान्चोक सम्पर्क केन्द्रमा शब्दयात्रा प्रकाशनका आजीवन सदस्य केदारनाथ तिमल्सिनाको जन्मदिवस मनाइएको छ । बनेपामा अवस्थित काभ्रेपलान्चोक सम्पर्क केन्द्रले आफ्नै कार्यालयमा आयोजना गरेको विशेष कार्यक्रममा श्री तिमल्सिनाले दीप, कलश र गणेशसहित अष्टचिरञ्जीवीको पूजा गर्नुभएको थियो । त्यसपछि शब्दयात्रा प्रकाशन काभ्रेपलान्चोक सम्पर्क केन्द्रका संयोजक साधुराम गिरीले श्री तिमल्सिनालाई रुद्राक्षको माला र शुभकामनापत्र समर्पण गर्नुभएको थियो । कार्यक्रममा सम्पर्क केन्द्रका सदस्य सहदीप पलान्चोके र नवराज तिमल्सिनाले शुभकामना मन्तव्य व्यक्त गर्नुभएको थियो । ‘शब्दसञ्चार’ रेडियो कार्यक्रमका प्रस्तोता शिव बन्जाराले सञ्चालन गर्नुभएको उक्त कार्यक्रमको पूजा व्यवस्थापन शकुन्तला बन्जारा र सङ्गीता केसीले गर्नुभएको थियो । कार्यक्रममा नारायणी न्यौपाने र शारदाप्रसाद शर्मा पनि उपस्थित हुनुहुन्थ्यो । शब्दयात्रा प्रकाशन काभ्रेपलान्चोक सम्पर्क केन्द्रले संस्थासँग सम्बन्धित व्यक्तिहरूको जन्मदिवस कार्यालयमै बोलाई वैदिक विधान बमोजिमको कार्यक्रम गरेर अथवा सम्बन्धित व्यक्तिको घरैमा गई अष्टचिरञ्जीवीको पूजा गरेर मनाउने गरेको छ भने त्यस बखत सम्बन्धित व्यक्तिलाई संस्थाका तर्फबाट शुभकामनापत्र र रुद्राक्षको माला पनि समर्पण गर्ने गरेको छ ।