नेपाल संस्कृत विश्वविद्यालयका उपकुलपति प्रा. डा. कुलप्रसाद कोइरालाले शब्दयात्रा प्रकाशनले थोरै समयमा धेरै काम गरेर भागीरथीको भगीरथ बनेको बताउनुभएको छ । उहाँले काठमाडौँ विश्वविद्यालय, धुलिखेल अस्पताल, शब्दयात्रा प्रकाशन र गोसाइँस्थान नैमिषारण्य क्षेत्र विकास समिति ‘गर्न चाहे सकिन्छ’ भन्ने कुराको उदाहरणका रूपमा प्रस्तुत भएका काभ्रे जिल्लाका गौरव हुन् पनि भन्नुभएको छ ।
डा. कोइराला शब्दयात्रा प्रकाशनको कार्यालय अवलोकन गर्न आउनुभएको थियो र अवलोकनपछि उहाँले उक्त कुरा बताउनुभएको थियो । उहाँका साथमा साझा प्रकाशन सञ्चालक समितिका सदस्य ग्रन्थसम्पादक जीवनचन्द्र कोइराला र अन्य व्यक्तिहरू गरी नौजना हुनुहुन्थ्यो ।
डा. कोइरालाको नेतृत्वमा आएको टोलीलाई शब्दयात्रा सम्मान व्यवस्थापक समाजका संयोजक रमेश पौड्यालले शब्दयात्रा प्रकाशनको कार्यालयमा स्वागत गर्नुभएको थियो । शब्दयात्रा प्रकाशनका अध्यक्ष हरि मञ्जुश्रीले शब्दयात्रा प्रकाशनबाट हालसम्म भएका गतिविधिहरूका बारेमा टोलीलाई जानकारी गराउनुभएको थियो । उहाँले डा. कोइरालालाई शब्दयात्रा प्रकाशनद्वारा प्रकाशित केही पुस्तकहरू उपहारस्वरूप अर्पण गर्नुभएको थियो भने टोलीमा सहभागी अन्यलाई संस्थाका प्रबन्धक शारदाप्रसाद शर्माले पुस्तकहरू उपहार प्रदान गर्नुभएको थियो ।
शब्दयात्रा प्रकाशनमा उपकुलपतिको भ्रमण
