शब्दयात्रा प्रकाशनको सल्लाहकारमण्डलका संयोजक, काठमाडौँ विश्वविद्यालयका संस्थापक उपकुलपति, नेपालका शैक्षिक शिरोभूषण डा. सुरेशराज शर्माको मल्टिपल अर्ग्यान फेलियर भएर यही २०८३ असोज ७ गते द्वादशी तिथि साँझ ६ः५० बजे काठमाडौँको ह्याम्स अस्पतालमा निधन भएको छ । उहाँको निधनले नेपालको शिक्षा तथा लेखनक्षेत्रमा अपूरणीय क्षति पुगेको छ ।
उहाँ नेपालको प्राविधिक शिक्षाका जनक हुनुहुन्थ्यो । उहाँ प्राविधिक शिक्षा तथा व्यावसायिक तालिम परिषद्का प्रथम कार्यकारी निर्देशक हुनुहुन्थ्यो । जुम्ला, दोलखा, धनकुटा, सिन्धुली आदि जिल्लामा विभिन्न टेक्निकल इन्स्टिच्युटहरूको स्थापना गर्नमा उहाँको अहम् भूमिका थियो । उहाँ राष्ट्रिय शिक्षा समितिको सदस्य–सचिव पनि हुनुहुन्थ्यो । उहाँले नेपालको शैक्षिक नीतिनिर्माणमा विशिष्ट योगदान गर्नुभएको थियो । उहाँ अन्तर्राष्ट्रिय ख्यातिप्राप्त नेपाली शिक्षाविद् तथा शैक्षिक व्यवस्थापक हुनुहुन्थ्यो । उहाँ रसायनशास्त्रका प्राध्यापक हुनुहुन्थ्यो ।
शिक्षा, यात्रासंस्मरण, व्यक्तिवृत्त र अनुसन्धानात्मक गरी एकल लेखनमा उहाँका १० वटा पुस्तक प्रकाशित छन् । अन्य लेखकसँगको संयुक्त लेखनमा पनि उहाँका पुस्तकहरू प्रकाशन भएका छन् । उहाँले विभिन्न जर्नलहरूको सम्पादन पनि गर्नुभएको छ ।
उहाँको यात्रासंस्मरणात्मक पुस्तक ‘स्वर्गमा पैदल’ शब्दयात्रा प्रकाशनको प्रकाशकत्वमा प्रकाशित भएको थियो । उहाँकी धर्मपत्नी उर्मिला शर्मा ढुङ्गेलले लेख्नुभएको ‘हे सुरेशराज शर्मा’ गान हरि मञ्जुश्रीको सङ्गीतमा शब्दयात्रा प्रकाशनबाटै उत्पादन गरिएको थियो । उहाँले शब्दयात्रा प्रकाशनका अधिकांश कार्यक्रमहरूमा प्रमुख आतिथ्य ग्रहण गरी विभिन्न महानुभावहरूलाई सम्मान तथा विभिन्न पुस्तकहरूको सार्वजनिकीकरण गर्नुभएको थियो । उहाँका विषयमा हरि मञ्जुश्रीद्वारा लिखित ‘शैक्षिक शिरोभूषण डा. सुरेशराज शर्मा’ पुस्तिका अक्षरधामबाट प्रकाशन गरिएको थियो भने शब्दयात्रा प्रकाशनले श्रीधर प्याकुरेलद्वारा लिखित ‘डा. सुरेशराज शर्मा’ र ‘शैक्षिक शिरोभूषण’ नामक दुई लघुकाव्य प्रकाशन गरेको थियो । हरि मञ्जुश्रीका दुई पुस्तक ‘विष्णुप्रसाद उपाध्याय जीवनी र व्यक्तित्व’ तथा ‘स्मृतिमा सावित्री ढुङ्गेल’ को प्रकाशन उहाँले नै गरिदिनुभएको थियो ।
उहाँलाई नर्वेबाट मानार्थ महाविद्यावारिधि उपाधि प्रदान गरिएको थियो । अन्य देशबाट पनि उहाँ सम्मानित हुनुहुन्थ्यो । उहाँले नेपाल सरकारबाट उज्ज्वल कीर्तिमय राष्ट्रदीप पदक, विभिन्न संस्थाबाट अन्य पदकहरू, विभिन्न संस्थाबाट षडानन्द पुरस्कार र दण्डपाणि अर्ज्याल पुरस्कार जस्ता विभिन्न पुरस्कारहरू, बीपी कोइराला स्वास्थ्यविज्ञान प्रतिष्ठानबाट ओरेसन र अन्य संस्थाबाट विभिन्न सम्मानहरू प्राप्त गर्नुभएको थियो । अक्षरधामको सक्रियतामा उहाँलाई काभ्रेपलाञ्चोक जिल्लाका ६० वटा संस्थाले एकै दिन अभिनन्दन गरेका थिए ।
अन्तिम समयसम्म पनि नेपालको शिक्षाक्षेत्रप्रति चिन्तनशील रहनुभएका उहाँ शब्दयात्रा प्रकाशन, कुलचन्द्र कोइराला स्मृति प्रतिष्ठान, कर्मयोगी बद्रीविक्रम थापा स्मृति सेवागुठी आदि साहित्यिक तथा सामाजिक संस्थाहरूसँग आबद्ध हुनुहुन्थ्यो ।
सिन्धुली जिल्लाको खुर्कोटमा १९९७ साल साउन ७ गते विष्णुप्रसाद उपाध्याय ढुङ्गेल र सावित्रीदेवी ढुङ्गेलका सुपुत्रका रूपमा उहाँको जन्म भएको थियो । उहाँकी धर्मपत्नी उर्मिला शर्मा ढुङ्गेलको निधन गत २०८१ साल कार्तिक १४ गते भएको थियो । उहाँका चार छोरीमध्ये १ छोरीको निधन भइसकेको छ ।
शब्दयात्रा प्रकाशन परिवार आफ्ना अभिभावकको निधनबाट विह्वल बनेको छ । यो संस्था उहाँको आत्मा परमात्मामा एकाकार होस् भनी नीलकण्ठेश्वर महादेवसँग प्रार्थना गर्दै शोकसन्तप्त परिवारजनप्रति हार्दिक सहवेदना व्यक्त गर्दछ ।
डा. सुरेशराज शर्मा रहनुभएन
