शब्दयात्रा प्रकाशनले २०८३ सालको ‘शब्दयात्रा मेलवादेवी गुरुङ महिला प्रतिभा सम्मान’ लोचन भट्टराई (सुनसरी) मा समर्पण गर्ने भएको छ । नेपालको साङ्गीतिक क्षेत्रमा आबद्ध रही शब्दको शुद्ध उच्चारण गर्नुपर्ने भाषिक नियमको पालना गर्दै वर्णमात्रिक र मात्रिक छन्दका सिर्जनालाई शास्त्रीय रागसँग समायोजन गरेर सुमधुर स्वरलहरीबाट गुञ्जायमान् पार्नुका साथै विभिन्न आधुनिक गीतहरूमा स्वर दिएर साङ्गीतिक समृद्धिका लागि चार दशकदेखि प्रयत्नरत रहनुभएकोमा उहाँलाई सम्मान समर्पण गर्न लागिएको हो । यो सम्मान आगामी असोज महिनामा शब्दयात्रा प्रकाशनको सभाकक्ष बनेपामा आयोजना गरिने समारोहमा समर्पण गरिनेछ । यस सम्मानको कोष व्यवस्थापन लेखक तथा पूर्वप्रशासक द्रोणप्रसाद श्रेष्ठ (भोजपुर) ले आफ्नी अर्धाङ्गिनी मनका श्रेष्ठको स्मृतिमा गर्नुभएको हो । सम्मान ग्रहण गर्न स्वीकृति दिएर छन्दगायिका लोचन भट्टराईले शब्दयात्रा प्रकाशनलाई गौरवान्वित बनाइदिनुभएको छ । स्मरणीय छ — नेपाली भाषाको गीत पहिलोपटक स्वराङ्कन गर्ने गायिका तथा सङ्गीतकार मेलवादेवी गुरुङको निधन इन्डियाको कलकत्तामा २०१२ सालमा भएको थियो । ‘ठुमरीकी रानी’ उपाधि पाएकी मेलवादेवी गुरुङको सालिक शब्दयात्रा प्रकाशनले बनेपामा स्थापना गरेको छ भने यस सम्मानका कोष व्यवस्थापक द्रोणप्रसाद श्रेष्ठले लेख्नुभएको ‘ठुमरीकी रानी’ पुस्तक शब्दयात्रा प्रकाशनले नै प्रकाशन गरेको छ ।
लोचन भट्टराईलाई महिला प्रतिभा सम्मान समर्पण गरिने
