शब्दयात्रा प्रकाशनले महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयमा कार्यरत दृष्टिविहीन उपसचिव नीरा अधिकारी (ललितपुर) लाई २०८३ सालको ‘शब्दयात्रा उर्मिला श्रेष्ठ प्रशासनिक महिला प्रतिभा पुरस्कार’ समर्पण गर्ने भएको छ । सबलाङ्ग मान्छेलाई समेत कठिन हुने काम सम्भव बनाउँदै अरूसरह प्रतिस्पर्धा गरेर निजामती सेवामा उपसचिव बनेकी नीरा अधिकारी करिब ३० जना दृष्टिविहीनहरू कार्यरत निजामती सेवामा पहिलो दृष्टिविहीन हुनुहुन्छ र साहित्यिक सिर्जना पनि गर्नुहुन्छ । समाजशास्त्र र जनप्रशासनमा स्नातकोत्तर पूरा गरेकी उहाँ दृष्टिविहीनहरूका लागि प्रेरणाको स्रोत र ‘काउन्सिलर’ बन्नुभएको छ । त्यसैले उहाँलाई पुरस्कृत गर्न लागिएको हो । पुरस्कार यही साउन १६ गते शनिबार समर्पण गरिनेछ । यस सम्मानको कोष व्यवस्थापन पूर्वप्रशासक तथा गायिका उर्मिला श्रेष्ठले गर्नुभएको हो । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन नीरा अधिकारीप्रति हार्दिक आभार प्रकट गर्दछ ।