अजयकुमार पोखरेलको पुस्तक ‘ग्वालटारदेखि बानेश्वरसम्म’ उहाँको आत्मसंस्मरण हो । विभिन्न २६ वटा उपशीर्षक दिएर प्रस्तुत गरिएको र जम्मा ८८ पृष्ठमा विस्तार भएको यो पुस्तक सिन्धुली जिल्लाको ग्वालटारबाट प्रारम्भ भएर काठमाडौँ पु्ग्छ, अनि नेपालका विभिन्न स्थानहरूका साथै विदेशमा इन्डिया, थाइल्याण्ड, संयुक्त राज्य अमेरिका, इण्डोनेसिया, फिलिपिन्स, सिङ्गापुर, पेरू र जापान जस्ता मुलुकहरू घुमेर फेरि काठमाडौँमै पुगी समाप्त हुन्छ । नेपालको भौतिक विकाससम्बन्धी निर्माण प्रक्रिया, प्रशासनिक संरचना र कार्यप्रणाली, शैक्षिक र सामाजिक वातावरण, नेपाली जनजीवन, पाँच दशकअघिको नेपालको परिवेश जस्ता विषयहरूमा यस पुस्तकका पाठकले जानकारी पाउनेछन् ।
