शब्दयात्रा प्रकाशनको साप्ताहिक कार्यक्रम ‘कर्मयोद्धासँग शब्दसंवाद’ को १०१ औँ शृङ्खला कवि केदारनाथ तिमल्सिनाको निवास बनेपामा सम्पन्न गरियो । गत २०७६ कार्तिक ८ गते शुक्रबार केदारनाथ तिमल्सिनाको सभापतित्व र शब्दयात्रा प्रकाशन सञ्चालक समितिका सदस्य शिव बन्जाराको प्रमुख आतिथ्यमा सञ्चालित उक्त कार्यक्रममा काभ्रे जिल्लामा बहुआयामिक अनुसन्धान केन्द्रको निर्माण कसरी गर्न सकिन्छ भन्ने विषयमा विचारविमर्श गरिएको थियो ।
कार्यक्रमको प्रारम्भमा शब्दयात्रा प्रकाशनका अध्यक्ष हरि मञ्जुश्रीले काभ्रे जिल्लामा बहुआयामिक अनुसन्धान केन्द्र निर्माण गर्न शब्दयात्रा प्रकाशनको स्थापना गरिएको बताउँदै त्यस संस्थाबाट हालसम्म भएका गतिविधिका बारेमा जानकारी गराएपछि वक्ताहरूले विभिन्न सुझावहरू प्रस्तुत गर्नुभएको थियो । सुझाव प्रस्तुत गर्नेहरूमा लेखक डा. इन्दुल केसी, गीतिभास्कर मच्छेश्वर सापकोटा, शिक्षासेवी चूडाप्रसाद चौलागाईं, चित्रकार चन्द्रमान सुवाल र समाजसेवी पुरुषोत्तम हुमागाईं हुनुहुन्थ्यो । प्रमुख अतिथिका रूपबाट शिव बन्जाराले कार्यक्रममा प्राप्त भएका सुझावहरूलाई कार्यान्वयन गर्दै जाने विषयमा छलफल गरिने कुरा बताउनुभयो ।
कार्यक्रममा व्यवस्थापनविद् श्री शर्मा मूर्ख, कवयित्री भवानी पाण्डे, ‘नेपालभूमि राष्ट्रिय साप्ताहिक’ का बजार व्यवस्थापक सङ्गीता केसी आदिको पनि उपस्थिति थियो ।
