शब्दयात्रा प्रकाशन काभ्रेपलान्चोक सम्पर्क केन्द्रको आयोजनामा शब्दयात्रा प्रकाशनका आजीवन सदस्य श्रीमती रश्मि अधिकारी हुमागाईंको जन्मदिवस मनाइएको छ । त्यस क्रममा भक्तपुरको दिव्यनगर चोकमा अवस्थित उहाँको निवासमै गई दीप, कलश र गणेशसहित अष्टचिरञ्जीवीको पूजा गरिएको थियो । त्यस बखत डा. पुष्पलाल हुमागाई, लक्ष्मीदेवी हुमागाईं र शब्दयात्रा प्रकाशनका संस्थापक अध्यक्ष हरि मञ्जुश्रीको उपस्थितिमा सम्पर्क केन्द्रका संयोजक साधुराम गिरीले उहाँलाई रुद्राक्षको मालासहित शुभकामनापत्र पनि समर्पण गर्नुभएको थियो । त्यस बखत रश्मि अधिकारी हु्मागाईंले आफ्नो जन्मदिवस मनाइदिएकोमा शब्दयात्रा प्रकाशन काभ्रेपलान्चोक सम्पर्क केन्द्रलाई धन्यवाद दिनुभएको थियो ।
यसै गरी काभ्रेपलान्चोक सम्पर्क केन्द्रले आजीवन सदस्य श्री लोकेन्द्र ढकालको पनि जन्मदिवस मनाएको छ । बनेपामा अवस्थित काभ्रेपलान्चोक सम्पर्क केन्द्रको कार्यालयमा आयोजित जन्मदिवस कार्यक्रममा दीप, कलश, गणेशसहित अष्टचिरञ्जीवीको पूजा गरिएको थियो । त्यस बखत लोकेन्द्र ढकाललाई शब्दयात्रा प्रकाशनका संस्थापक अध्यक्ष हरि मञ्जुश्रीले शुभकामनापत्र तथा काभ्रेपलान्चोक सम्पर्क केन्द्रका संयोजक साधुराम गिरीले रुद्राक्षको माला समर्पण गर्नुभएको थियो । कार्यक्रममा सम्पर्क केन्द्रका सदस्य सहदीप पलान्चोकेले लोकेन्द्र ढकालका विषयमा लेख्नुभएको कविता वाचन गर्नुभएको थियो भने अनुसन्धान समितिका संयोजक डा. इन्दुल केसीले मन्तव्य व्यक्त गर्नुभएको थियो । ‘शब्दसञ्चार’ रेडियो कार्यक्रमका प्रस्तोता शिव बन्जाराले विसर्जन गर्नुभएको उक्त कार्यक्रमको व्यवस्थापन शकुन्तला बन्जारा र नारायण सापकोटाले गर्नुभएको थियो ।
शब्दयात्रा प्रकाशन काभ्रेपलान्चोक सम्पर्क केन्द्रले संस्थासँग सम्बन्धित व्यक्तिहरूको जन्मदिवस कार्यालयमै बोलाई हिन्दू विधान बमोजिमको कार्यक्रम गरेर अथवा सम्बन्धित व्यक्तिको घरैमा गई अष्टचिरञ्जीवीको पूजा गरेर मनाउने गरेको छ भने त्यस बखत सम्बन्धित व्यक्तिलाई संस्थाका तर्फबाट शुभकामनापत्र र रुद्राक्षको माला पनि समर्पण गर्ने गरेको छ । यसपटक आजीवन सदस्य दुईजनाको जन्मदिवस एकै हप्तामा परेको थियो ।
शब्दयात्रा प्रकाशनले मनायो दुईजना आजीवन सदस्यको जन्मदिवस
