शब्दयात्रा प्रकाशनबाट ‘नेपालको प्राचीन इतिहास भ्रम तथा निवारण’ नामक पुस्तक प्रकाशन हुने भएको छ । अनुसन्धाता भरतमणि जङ्गमद्वारा लिखित यो पुस्तक शब्दयात्रा प्रकाशनको १ सय ४९ औँ प्रकाशनपुष्प हो । जम्मा २ सय ६४ पृष्ठको यस पुस्तकको मूल्य ४ सय रुपियाँ राखिएको छ ।
यस पुस्तकमा भिँद्यो महाभारतकालीन भीमसेन होइनन्, चाँगुनारायणको नाउँ दोलाशिखर स्वामी होइन, अनन्तलिङ्गेश्वर लोकपाल स्वामी शैवदेवता हुन्, हलिपट नागनागिनी होइन तथा धनेश्वर महादेव र त्यसको ऐतिहासिक पृष्ठभूमि जस्ता १३ वटा लेखहरू राखिएका छन् ।
यस पुस्तकमा प्राचीन नेपालको इतिहासलेखनमा देखिएका अपुष्ट, अव्याख्येय, अतार्किक र असान्दर्भिक विषयलाई पुष्टि गर्ने, व्याख्या गर्ने, तर्कसम्मत बनाउने, सान्दर्भिकता प्रदान गर्ने र अपव्याख्या भएका प्रसङ्गलाई सही व्याख्या गरेर इतिहासलेखनलाई प्रामाणिक स्वरूप दिने लेखहरू रहेकाले यस पुस्तकबाट प्राचीन नेपालको इतिहासलेखनमा देखापरेका भ्रमहरूको निवारण गर्न सकिने र हालसम्मको पछिल्लो अनुसन्धान यही नै भएकाले यसपछिको अनुसन्धानले यसभित्रका किटानीहरूको खण्डन नगरेसम्म प्राचीन नेपालको इतिहासमा देखापरेका केही भ्रमहरूको अन्तिम निवारण यही नै हो भनेर स्वीकार गर्नुपर्ने कुरा प्रकाशन संस्थाका अध्यक्ष हरि मञ्जुश्रीले बताउनुभएको छ ।
