शब्दयात्रा प्रकाशनको पाँचौँ वार्षिक कार्यक्रमका रूपमा सम्मान समर्पण तथा पुस्तक सार्वजनिकीकरण समारोहको आयोजना गरियो । गत २०७३ भदौ १४ गते मङ्गलबार बनेपाको केएन ब्यान्क्वेटमा आयोजित उक्त समारोहमा साहित्यकार तथा सञ्चार–सचिव दिनेश थपलिया प्रमुख अतिथि हुनुहुन्थ्यो भने उहाँ उपस्थित हुन नसक्नुभएकाले उहाँको प्रतिनिधित्व सूचना विभागका महानिर्देशक रघुराम विष्टले गर्नुभएको थियो । विशिष्ट अतिथिका रूपमा अग्रज साहित्यकार तथा समाजसेवी गणेशबहादुर खत्री र अतिथिका रूपमा प्रा. डा. नन्दीश अधिकारी उपस्थित हुनुहुन्थ्यो ।
शब्दयात्रा प्रकाशनका अध्यक्ष हरि मञ्जुश्रीले सञ्चालन गर्नुभएको उक्त समारोहको प्रारम्भमा काभ्रे जिल्लाको एक मात्र संस्कृत गुरुकुल नैमिषारण्य संस्कृत गुरुकुलका वटुृकहरूले स्वस्तिवाचन गरेका थिए । वटुकहरूलाई तुतुकाजी प्रणामी श्रेष्ठले टीका लगाई दक्षिणा दिनुभएको थियो हरिभक्त भोछिभोयाले ‘सावित्री सुगीता’ पुस्तक उपहार दिनुभएको थियो । नैमिषारण्य गुरुकुललाई ‘नेपालभूमि साप्ताहिक’ का तर्फबाट संस्थापक प्रधान सम्पादक रामचन्द्र हुमागाईं र सम्पादक सुमन खड्काले आभारपत्र प्रदान गर्नुभएको थियो ।
कार्यक्रमको अवसरमा ‘नेपालभूमि साप्ताहिक’ ले विशेषाङ्क प्रकाशन गरी वितरण गरेको थियो भने ‘डा. सुरेशराज शर्मा’ र ‘नेपाल कम्पन’ नामक दुई लघुकाव्य समारोहमा उपस्थित सबैलाई निःशुल्क वितरण गरिएको थियो ।
कार्यक्रममा शब्दयात्रा प्रकाशन सदस्य हरिगोपाल प्रधानले स्वागत भाषण गर्नुभएको थियो भने अर्का सदस्य सकुल थापाले प्रमुख अतिथि, विशेष अतिथि र अतिथिमा उपहार समर्पण गर्नुभएको थियो । कार्यक्रमको समीक्षासहित सभाविसर्जन प्रा. डा. नन्दीश अधिकारीले गर्नुभएको थियो ।
कार्यक्रमका विविध पक्षहरूमा मोहनविनोद बजगाईं, पदमनाथ ढुङ्गाना, सुदर्शन आचार्य, त्रिरत्न रन्जितकार, दीपक तिमल्सिना आदिले सहयोग गर्नुभएको थियो ।
समारोहमा प्रा. डा. सञ्जयनाथ खनाल, आध्यात्मिक लेखक मुकुन्दप्रसाद उपाध्याय, व्यवस्थापनविद् श्री शर्मा मूर्ख, शिक्षासेवी रामप्रसाद अधिकारी आदिलगायत विभिन्न महानुभावहरूको उपस्थिति थियो ।
कार्यक्रमका विषयमा भोलिपल्ट बुधबार प्रसारण भएको शब्दयात्रा प्रकाशनको साप्ताहिक रेडियो कार्यक्रम ‘शब्दसञ्चार’ बाट पनि जानकारी गराइएको थियो ।
शब्दयात्रा प्रकाशनको पाँचौं वार्षिक कार्यक्रम सम्पन्न
