परदेशको कथा 

काफलबोटे कान्छाको कवितासङ्ग्रह परदेशको कथा’ नेपालको आजको कथा हो, परदेशमा पुगेको घरदेशको कथा हो, विदेशीले देखेको स्वदेशीको कथा हो र स्वदेशीले भोगेको स्वदेशको कथा हो । तर शार्दूलबिक्रीडित, मन्दाक्रान्ता, अनुष्टुप, पञ्चचामर, वसन्ततिलका आदिजस्ता वर्णमात्रिक छन्दका कविताहरूको सङ्ग्रहका रूपमा यो कथा आएको छ । कविले यी कविता गाउँदा कविताबाट वर्तमान युवा पुस्ताको वेदना झर्छ, भक्कानो झर्छ, हिक्का झर्छ र आँसु झर्छ । गलत राजनीतिक संस्कारबाट जर्जर र रुग्ण बनेको नेपालको दुर्दशा र दुर्भाग्यको चित्र पनि आँखाअगाडि आउँछ ।