यी दुई केटाकेटी रहेछन् श्रीखण्डपुर माध्यमिक विद्यालयमा पढ्ने छात्रछात्रा निखिल वाइबा र लक्ष्मी बिसुङ्खे । पढाइमा तेजिला भए पनि यी दुई केटाकेटी आर्थिक अवस्था ज्यादै कमजोर रहेको घरका रहेछन् र शारीरिक अवस्था पनि कमजोर रहेछ । शब्दयात्रा प्रकाशनका आजीवन सदस्य शिव बन्जाराले यी दुई केटाकेटीलाई शब्दयात्रा प्रकाशनले आज २०७९ साल भदौ १८ गते आफ्नै सभाकक्षमा आयोजना गरेको कार्यक्रममा उपस्थित गराउनुभयो । उनीहरूको अवस्था देख्ता र सुन्दा द्रवित बनेर शब्दयात्रा प्रकाशनका आजीवन सदस्य तथा भोजपुर जिल्लाका शैक्षिक नक्षत्र प्रा. केदारनाथ श्रेष्ठले दुवै केटाकेटीलाई पाँच–पाँच हजार रुपियाँ छात्रवृत्ति प्रदान गर्नुभयो । शब्दयात्रा प्रकाशन दिने र लिने दुवैको संयोजक बन्न पाइरहोस्, प्रा. केदारनाथ श्रेष्ठ सुकीर्तिमय भएर सक्रिय जीवन जिइरहन सक्नुहोस्, दुवै केटाकेटीको स्वास्थ्यमा सुधार आई पढाइ अगाडि बढिरहोस्, शिव बन्जारालाई यस्तो सत्कर्म गर्ने प्रेरणा प्राप्त भइरहोस्, मेरो हार्दिक कामना छ ।