शब्दयात्रा प्रकाशनले अमेरिकाको हवाई विश्वविद्यालयमा एसियन स्टडिज विषय पढाउने एसोसिएट प्रोफेसर तथा दक्षिण एसियाली अध्ययन केन्द्रका निर्देशक डा. अन्ना स्टिरलाई शब्दयात्रा विशेष सम्मान समर्पण गर्ने भएको छ । डा. अन्ना स्टिरले नेपालको लोकदोहोरी गीतलाई विषयवस्तु बनाई कोलम्बिया विश्वविद्यालयबाट विद्यावारिधि गर्नुभएको छ । उहाँ नेपाली भाषामा लोकदोहोरी गाउने गायिका पनि हुनुहुन्छ । उहाँले नेपाली गीत–सङ्गीत, सामाजिक जीवन, लोकसंस्कृति आदिका विषयमा अङ्ग्रेजी भाषामा लेखहरू लेखी अन्तर्राष्ट्रिय जर्नलहरूमा प्रकाशित गराउनुभएको छ । उहाँले नेपाली जनजीवनका बारेमा लेखेको कृति अक्सफोर्ड युनिभर्सिटी प्रेसबाट छापिएको छ । शब्दयात्रा प्रकाशन १० वर्ष पुगेको अवसर पारी अमेरिकी नागरिक डा. अन्ना स्टिरलाई शब्दयात्रा विशेष सम्मान समर्पण गर्ने निर्णय गरिएको हो ।