शब्दयात्रा प्रकाशनले २०७४ वर्षको आमसञ्चार सम्मान अग्रज आमसञ्चारकर्मी होमनाथ दाहाल र शिक्षा सम्मान नेपालकै सबैभन्दा जेठो शिक्षालय षडानन्द माध्यमिक विद्यालयलाई समर्पण गरेको छ । यसै गरी विज्ञान–प्रविधि सम्मानबाट प्रथम कम्प्युटर प्रोग्रामर मुनिबहादुर शाक्य र सामाजिक जागरण सम्मान काभ्रे जिल्लामा सक्रिय लभग्रीन नेपाल नामक संस्थालाई समर्पण गरिएको छ ।
प्रमुख अतिथि वरिष्ठ कवि तथा अग्रज संस्कृतिविद् तुलसी दिवसले उहाँहरूलाई अभिवन्दनापत्रबाट सम्मानित गर्नुभयो । उहाँहरूलाई मुकुन्दप्रसाद दाहालले उपहार, गीता अधिकारी, पदमनाथ ढुङ्गाना, रमेश पौड्याल र सहदेव श्रेष्ठले नगद पाँच–पाँच हजार रुपियाँ, हरि मञ्जुश्रीले रुद्राक्षको माला समर्पण गर्नुभएको थियो भने पोष चापागाईंले किरीट लगाइदिनुभएको थियो । यी सम्मानहरूसहित शब्दयात्रा प्रकाशनद्वारा सम्मानित व्यक्ति तथा संस्थाहरूको सङ्ख्या एक सय पुगेको छ ।
सम्मानित व्यक्ति तथा संस्थाहरूबाट आशीर्वचन लिने क्रममा लभग्रीन नेपालका अध्यक्ष केशव अर्यालबाट कृष्णमणि कुइँकेलले, मुनिबहादुर शाक्यबाट इ. रोशन मञ्जुश्री अधिकारीले, होमनाथ दाहालबाट शिव बन्जाराले र षडानन्द माध्यमिक विद्यालयका पूर्वप्रधानाध्यापक तीर्थ न्यौपानेबाट पूर्णबहादुर कार्कीले आशीर्वचन ग्रहण गर्नुभएको थियो । सम्मानित व्यक्तित्वहरूका विषयमा सम्मानित व्यक्तित्व चयन समितिका संयोजक मुकुन्दप्रसाद दाहालले जानकारी गराउनुभएको थियो ।
चार सम्मान समर्पण
