शब्दयात्रा प्रकाशनको आयोजनामा आज साउन ९ गते शनिबार चारवटा पुस्तकलाई सार्वजनिक गरियो । नेपाल संस्कृत विश्वविद्यालयका उपकुलपति प्रा. डा. कुलप्रसाद कोइरालाको प्रमुख आतिथ्यमा सम्पन्न आजको कार्यक्रममा डा. भानु थपलियाद्वरा लिखित ‘वैज्ञानिक मानववाद’ तथा प्रकाश उज्ज्वल बनेपाद्वारा लिखित ‘चिन्तनधारा’ (लेखसङ्ग्रह), ‘जीवनचक्र’ (कथासङ्ग्रह) र ‘जीवन घःचा’ (नेपाल भाषाको कथासङ्ग्रह) लाई सार्वजनिक गरिएको थियो ।
सार्वजनिक गरिएका पुस्तकहरूका बारेमा पत्रकार तीर्थ कोइराला तथा साहित्यकारद्वय डा. इन्दुल केसी र पशुपतिमान पःमाले टिप्पणी गर्नुभएको थियो भने समालोचक प्रा. डा. कृष्णप्रसाद दाहाल र शिक्षासेवी रामप्रसाद अधिकारीले पनि मन्तव्य व्यक्त गर्नुभएको थियो । कार्यक्रमको समुद्घाटन सञ्चारकर्मी तथा साहित्यकार प्रकाशप्रसाद उपाध्यायले र सञ्चालन कवयित्री कालिका त्रिपाठी पन्तले गर्नुभएको आजको कार्यक्रमको सभापतित्व हरिगोपाल प्रधानले गर्नुभएको थियो । चारैवटा पुस्तक शब्दयात्रा प्रकाशनले प्रकाशन गरेका हुन् । यीसमेत शब्दयात्रा प्रकाशनबाट प्रकाशित पुस्तकको सङ्ख्या २८३ पुगेको छ ।