शब्दयात्रा प्रकाशनको आयोजनामा गत २०७४ साउन १८ गते बुधबार काभ्रे बनेपाको कृष्ण–गीता परिसरमा नेपालका मूर्धन्य साधकहरूको सालिक स्थापना गर्नका लागि शिलान्यास कार्य सम्पन्न गरियो ।
नेपालका प्रथम शिक्षासेवी बालागुरु षडानन्दको सालिकको शिलान्यास शब्दयात्रा सहयोगी समाजका संयोजक रामप्रसाद अधिकारीले, प्रथम लोकतान्त्रिक पत्रकार देवीप्रसाद सापकोटाको सालिकको शिलान्यास शब्दयात्रा पत्रकार समाजका संयोजक रामचन्द्र हुमागाईंले, प्रथम साहित्यिक सहिद कृष्णलाल अधिकारीको सालिकको शिलान्यास शब्दयात्रा लेखक समाजका संयोजक ओतबहादुर खड्काले, स्वराङ्कन गर्ने प्रथम गायिका मेलवादेवी गुरुङको सालिकको शिलान्यास गायिका सरस्वती सापकोटाले र राष्ट्रिय पुरस्कार पाउने प्रथम नेपाली वैज्ञानिक नरबहादुर भारतीको सालिकको शिलान्यास जग्गादाता कृष्णमणि कुइँकेलले गर्नुभएको थियो ।
शिलान्यासपछिको समारोहमा सालिकका लागि व्यक्तित्व चयन गर्ने समितिका तर्फबाट गोपाल पराजुली, अर्थसङ्कलन सहयोगीका तर्फबाट द्रोणप्रसाद श्रेष्ठ, सालिक राखिने व्यक्तित्वको परिवारका तर्फबाट सुनील सापकोटा र कृतिकारहरूका तर्फबाट सुश्री निर्मलाकुमारी यगोल श्रेष्ठले मन्तव्य व्यक्त गर्नुभएको थियो ।
शब्दयात्रा प्रकाशनका अध्यक्ष हरि मञ्जुश्रीको सभापतित्वमा सम्पन्न उक्त कार्यक्रमको सञ्चालन महाप्रबन्धक शारदाप्रसाद शर्माले र समापन ‘शब्दसंवाद’ का संयोजक पदमनाथ ढुङ्गानाले गर्नुभएको थियो ।
शिलान्यासअघिको पूजनकार्य कवि श्रीधर प्याकु¥यालको पौरोहित्यमा हरि मञ्जुश्रीले गर्नुभएको थियो । नैमिषारण्य गुरुकुलम्का वटुकहरूबाट स्वस्तिवाचन गरिएको शिलान्यास कार्यक्रमको व्यवस्थापन शारदाप्रसाद शर्मा र पदमनाथ ढुङ्गानाबाट भएको थियो भने सहयोगीको भूमिका भुवन पाण्डेले निर्वाह गर्नुभएको थियो ।
शिलान्यास कार्यक्रममा सकुल थापा, मच्छेश्वर सापकोटा, गणेशदास उलक, तुतुकाजी प्रणामी श्रेष्ठ, चन्द्रबहादुर खड्का, गीता कुइँकेल, नानु कुइँकेल, प्राचार्य दिव्यमणि अधिकारी, दण्डपाणि अधिकारी, सुदर्शन पोखरेल, इन्दिरा अधिकारी, तीर्थराज अधिकारी, दीक्षा घिमिरे, हरिप्रसाद चौलागाईं, अमृत अधिकारी, गीता मञ्जुश्री अधिकारी, फणीन्द्रराज अधिकारी, सुदर्शन आचार्य, पूर्णबहादुर कर्माचार्य, पुण्यवती घले, पूर्णबहादुर कार्की, सरिता केसी आदिको उपस्थिति रहेको थियो ।