शब्दयात्रा प्रकाशनले समाजसेवी तथा लेखक पूर्णबहादुर कर्माचार्य (काभ्रेपलाञ्चोक) लाई २०८३ सालको ‘शब्दयात्रा लीला–मध्यमार्ग काभ्रेपलाञ्चोक प्रतिभा पुरस्कार’ समर्पण गर्ने भएको छ । उहाँको नेतृत्व र सक्रियतामा स्थानीय जनतालाई सहभागी बनाई काभ्रेपलाञ्चोक जिल्लाको श्रीखण्डपुरमा नेपालकै नमुना मानिएको ढल प्रशोधन केन्द्र स्थापना गरेर त्यसबाट बायोग्यास निकाली स्थानीय जनतामा वितरण गरिएको थियो । उहाँले श्रीखण्डपुरका विषयमा पुस्तकहरू लेखी प्रकाशन गराएर नयाँ पुस्तालाई स्थानीय इतिहास, संस्कृति र परम्पराको जानकारी पनि दिनुभएको छ । उहाँका यिनै योगदानका लागि उहाँलाई पुरस्कृत गर्न लागिएको हो । पुरस्कार यही साउन १६ गते शनिबार समर्पण गरिनेछ । यस सम्मानको कोष व्यवस्थापन पनौतीका समाजसेवी लीलाबहादुर केसीको स्मृति र सम्मानमा उहाँका नाति निरोज थापाले पत्रकार प्रदीप केसीमार्फत गर्नुभएको हो । पुरस्कार ग्रहण गर्न स्वीकृति प्रदान गर्नुभएकोमा शब्दयात्रा प्रकाशन पूर्णबहादुर कर्माचार्यप्रति हार्दिक आभार प्रकट गर्दछ ।