शब्दयात्रा प्रकाशनले गत २०७४ साल जेठ २४ गते बुधबार काभ्रेपलाञ्चोक जिल्लाका छवटै नगरपालिकाका नवनिर्वाचित प्रमुख र उपप्रमुखहरूको सम्मानमा स्वागत, बधाई, उपहार तथा शुभकामनापत्रका साथ सम्मान ग¥यो ।
कार्यक्रममा सभापतिका रूपबाट स्वागत गर्दै शब्दयात्रा प्रकाशनका अध्यक्ष हरि मञ्जुश्रीले काभ्रेपलाञ्चोक जिल्लामा नेपालमै पहिलोपटक वाङ्मयिक अनुसन्धान केन्द्र बनाउने लक्ष्य राखिएको जानकारी दिँदै त्यसका लागि बनेपाको ६ नं. वडामा रहेको शब्दयात्रा प्रकाशनको जग्गामा शब्दयात्रा स्तम्भ र अनुसन्धान केन्द्रको भवनसहित नेपालका प्रथम शिक्षासेवी बालागुरु षडानन्द, प्रथम साहित्यिक सहिद कृष्णलाल अधिकारी, स्वराङ्कन गर्ने प्रथम गायिका मेलवादेवी गुरुङ र प्रथम लोकतान्त्रिक पत्रकार देवीप्रसाद सापकोटाको अर्धकदको सालिक नेपालमै पहिलोपटक एकै ठाउँमा स्थापना गर्न लागिएको कुरा बताउनुभयो । काभ्रेपलाञ्चोक जिल्लासँग जोडिएका र कुनै पनि विधामा योगदान गरेका व्यक्तिका विषयमा तथा राष्ट्रिय–अन्तर्राष्ट्रिय स्तरका ख्यातिप्राप्त व्यक्तित्वहरूका बारेमा अनुसन्धान गर्नुपर्दा हरेक व्यक्तिले हाम्रै जिल्लामा आउनुपर्ने गरी अनुसन्धान केन्द्र बनाउने हाम्रो लक्ष्य हो भन्दै उहाँले त्यसबाट नेपालभरिका शिक्षासेवी, अनुसन्धाता, प्राध्यापक, साहित्यकार, पत्रकार र कलाकारका लागि हाम्रो जिल्ला आउनैपर्ने स्थल बन्नेछ भन्नुभयो ।
कार्यक्रम संयोजक हरिगोपाल प्रधानले धन्यवाद ज्ञापन गर्नुका साथै शुभकामनापत्र प्रदान गर्नुभएको उक्त कार्यक्रममा अर्का कार्यक्रम संयोजक सकुल थापा र गीता मञ्जुश्रीले मङ्गलाचरणबाट कार्यक्रमको समुद्घाटन गर्नुभएको थियो । महाप्रबन्धक शारदाप्रसाद शर्माद्वारा सञ्चालित उक्त कार्यक्रममा प्रमुख–उपप्रमुखलाई पुण्यवती घलेले माला अर्पण गर्नुभएको थियो ।
कार्यक्रममा बनेपा नगरपालिकाका प्रमुख लक्ष्मीनरसिंह बादे र उपप्रमुख रेखा सापकोटा दाहाल, धुलिखेल नगरपालिका प्रमुख अशोक ब्यान्जू श्रेष्ठ र उपप्रमुख विमला शर्मा चौलागाई, पनौती नगरपालिकाका प्रमुख भीम न्यौपाने र उपप्रमुख गीता बन्जारा, पाँचखाल नगरपालिकाका प्रमुख महेश खरेल र उपप्रमुख लक्ष्मी दनुवार, नमोबुद्ध नगरपालिकाका प्रमुख टी. पी. शर्मा तिमल्सिना र उपप्रमुख रामदेवी तामाङ तथा मन्डन देउपुर नगरपालिकाका प्रमुख टोकबहादुर वाइबा र उपप्रमुख निर्मला शाहीलाई सम्मान गरिएको थियो ।
