शब्दयात्रा प्रकाशनले २०८१ सालको ‘शब्दयात्रा प्रा. केदारनाथ–लीला श्रेष्ठ भोजपुर अनुसन्धान विद्वतवृत्ति’ अमृत अधिकारीलाई प्रदान गर्ने भएको छ । यसअघिका दुई वर्षमा भोजपुर अनुसन्धान विद्वतवृत्ति अन्तर्गत प्राप्त भएका अनुसन्धान प्रतिवेदनहरूलाई समायोजन गरी उहाँले एउटै पुस्तकका रूपमा मुद्रण गर्न योग्य बनाइदिनुहुनेछ । भोजपुरका शिक्षासेवी प्रा. केदारनाथ श्रेष्ठ र उहाँकी अर्धाङ्गिनी साहित्यकार लीला श्रेष्ठले शब्दयात्रा प्रकाशनमा खडा गर्नुभएको अक्षयकोषको ब्याजबाट यो विद्वतवृत्ति हरेक वर्ष शब्दयात्रा प्रकाशनले प्रदान गर्ने गरेको छ । विद्वतवृत्ति प्राप्त गर्न लाग्नुभएकोमा अमृत अधिकारीप्रति शब्दयात्रा प्रकाशन परिवार हार्दिक बधाई ज्ञापन गर्दछ ।