शब्दयात्रा प्रकाशनले २०८३ सालको ‘शब्दयात्रा षडानन्द अधिकारी आध्यात्मिक पत्रकारिता सम्मान’ दिव्यपुरी टेलिभिजन (काठमाडौँ) मा समर्पण गर्ने भएको छ । विभिन्न अध्यात्म–साधकहरूको साधनायात्रा र आध्यात्मिक जागरणका विषयमा ज्ञानवर्द्धक सामग्रीहरू प्रस्तुत गरी आध्यात्मिक पत्रकारिताका माध्यमबाट सामाजिक चेतनावृद्धिका लागि अहम् भूमिका निर्वाह गरिरहेको हुँदा दिव्यपुरी टेलिभिजनलाई सम्मान गर्न लागिएको हो । यो सम्मान आगामी असोज महिनामा शब्दयात्रा प्रकाशनको सभाकक्ष बनेपामा आयोजना गरिने समारोहमा समर्पण गरिनेछ । यस सम्मानको कोष व्यवस्थापन समाजसेवी सुदर्शन आचार्य (काभ्रेपलाञ्चोक) ले गर्नुभएको हो । सम्मान ग्रहण गर्न स्वीकृति दिएर दिव्यपुरी टेलिभिजनका संस्थापक अध्यक्ष नारदमणि पौड्यालले शब्दयात्रा प्रकाशनलाई गौरवान्वित बनाइदिनुभएको छ । स्मरणीय छ — नेपालमा निजी क्षेत्रबाट सामुदायिक विद्यालयको स्थापना गरी सबै जातिलाई शिक्षा दिने पहिलो शिक्षासेवी तथा आध्यात्मिक विभूति आबाल ब्रह्मचारी षडानन्द अधिकारीको स्मृतिमा यस सम्मानको स्थापना गरिएको हो । षडानन्द अधिकारीको सालिक शब्दयात्रा प्रकाशनले बनेपामा स्थापना गरेको छ ।