शब्दयात्रा प्रकाशनलाई १५ हजार रुपियाँ राशीको सीता राणा प्रतिभा पुरस्कार प्रदान गरिएको छ । गत २०७५ मङ्सिर २८ गते शुक्रबार काठमाडौँमा कर्ण कौशल्या सीता राणा स्मृति प्रतिष्ठान तथा भोग्य सगुन सेवा समाजद्वारा संयुक्त रूपमा आयोजित समारोहमा प्रमुख अतिथिका रूपबाट अर्थविद् तथा पूर्वगभर्नर हिमालय शमशेर राणाले उक्त पुरस्कार प्रदान गर्नुभएको हो । उक्त पुरस्कार संस्थाका तर्फबाट अध्यक्ष हरि मञ्जुश्रीले ग्रहण गर्नुभएको थियो ।
डा. केदार न्यौपानेको सभापतित्वमा जीवनचन्द्र कोइरालाबाट सञ्चालित उक्त कार्यक्रममा शब्दयात्रा प्रकाशनका विषयमा साहित्यकार कलाधर काफ्लेले जानकारी गराउनुभएको थियो भने स्वागत भाषण डा. विष्णु सापकोटाले गर्नुभएको थियो ।
कार्यक्रममा शब्दयात्रा प्रकाशनका तर्फबाट हरि मञ्जुश्री, कृष्णमणि कुइँकेल, चूडाप्रसाद चौलागाईं, माधवप्रसाद तिवारी, द्रोणप्रसाद श्रेष्ठ र चन्द्रबहादुर खड्काले सहभागिता जनाउनुभएको थियो ।
उक्त कार्यक्रममा पत्रकारद्वय ध्रुवहरि अधिकारी र गोपाल बस्नेत तथा समाजसेवी नवराज लामिछानेलाई पनि पुरस्कृत तथा चलचित्र कलाकार जयनन्द चन्द ठाकुरलाई आर्थिक सहयोग गरिएको थियो ।
शब्दयात्रा प्रकाशन पुरस्कृत
