मतिपुराण सार्वजनिक

अग्रज पत्रकार तथा साहित्यकार बलदेव थापाले लेख्नुभएको हास्यव्यङ्ग्यसङ्ग्रह ‘मतिपुराण’ सार्वजनिक गरिएको छ । उहाँका छोरा उद्धव थापा र बुहारी सिर्जना थापाले संयुक्त रूपमा उक्त पुस्तक सार्वजनिक गर्नुभएको हो । कार्यक्रममा आफ्नो पुस्तकका बारेमा लेखक बलदेव थापाले जानकारी दिनुभएको थियो । कार्यक्रम शब्दयात्रा प्रकाशनको सभाकक्षमा आयोजना गरिएको थियो । शब्दयात्रा प्रकाशनको २७२ औँ प्रकाशन रहेको ‘मतिपुराण’ बलदेव थापाद्वारा लिखित तेस्रो कृति हो । यसअघि उहाँका ‘बा’ को वाम’ (एतिहासिक परिचय) र ‘कुराको सास्ती’ (व्यङ्ग्यकवितासङ्ग्रह) प्रकाशित थिए । ‘मतिपुराण’ मा १०८ वटा हास्यव्यङ्ग्यात्मक निबन्धहरू छन् । संवाद शैलीमा लेखिएको यो सङ्ग्रह २६४ पृष्ठको छ र मूल्य ५०० रुपियाँ राखिएको छ । पुस्तकमा सुप्रसिद्ध हास्यव्यङ्ग्यकार प्रा. रामकुमार पाँडेको मन्तव्य रहेको छ । यो पुस्तक www.sypublication.com.np/baldevthapa टाइप गरेपछि अनलाइनमा पनि पढ्न पाइन्छ ।