शब्दयात्रा प्रकाशनले २०८३ सालको ‘शब्दयात्रा माधवी अधिकारी छात्रवृत्ति’ ओखलढुङ्गा घर भई हाल काभ्रेपलाञ्चोक जिल्लाको बनेपामा अवस्थित काभ्रे माध्यमिक विद्यालयमा कक्षा ८ मा अध्ययनरत विपन्न तर जेहेन्दार छात्रा श्रीजला बस्नेतमा समर्पण गरेको छ । शब्दयात्रा प्रकाशनका संस्थापक अध्यक्ष हरि मञ्जुश्रीले श्रीजला बस्नेतलाई छात्रवृत्तिको रकम र प्रमाणपत्र समर्पण गर्नुभयो । उहाँले छात्रवृत्ति पाउनुपर्ने विद्यार्थी छनोट गरिदिएकोमा काभ्रे माध्यमिक विद्यालयका लागि आभारपत्र समर्पण पनि गर्नुभयो । यस छात्रवृत्तिको आर्थिक व्यवस्थापन आफ्नी धर्मपत्नी साहित्यकार तथा शिक्षासेवी माधवी अधिकारीको स्मृति र सम्मानमा लेखक, वैज्ञानिक तथा काठमाडौँ विश्वविद्यालयका संस्थापक रजिस्ट्रार प्रा. डा. सीताराम अधिकारीले गर्नुभएको हो । उहाँ कार्यक्रममा उपस्थित हुन नसक्नुभएकाले उहाँका तर्फबाट हरि मञ्जुश्रीले छात्रवृत्ति र आभारपत्र समर्पण गर्नुभएको थियो । छात्रवृत्ति समर्पण समारोह यही २०८३ जेठ ९ गते शनिबार शब्दयात्रा प्रकाशनको सभाकक्ष बनेपामा सम्पन्न भएको थियो ।
माधवी अधिकारी छात्रवृत्ति समर्पण
