शब्दयात्रा प्रकाशनद्वारा प्रकाशित दुई पुस्तक एक विशेष कार्यक्रममा सार्वजनिक गरिएका छन् । नवीना श्रेष्ठद्वारा लिखित सातौँ पुस्तक ‘शङ्खमूल माहात्म्य र कुम्भेश्वर महादेव’ पुस्तक समाजसेवी तथा कार्यक्रमका सभापति बेलप्रसाद श्रेष्ठबाट र किरण त्रिपाठी पन्तद्वारा लिखित दोस्रो पुस्तक ‘कुँडिएका मनहरू’ कवितासङ्ग्रह काठमाडौँ विश्वविद्यालयका संस्थापक उपकुलपति नेपालका शैक्षिक शिरोभूषण तथा कार्यक्रमका प्रमुख अतिथि डा. सुरेशराज शर्माबाट सार्वजनिक गरिएका हुन् ।
यी दुई पुस्तकसमेत शब्दयात्रा प्रकाशनबाट प्रकाशित पुस्तकको सङ्ख्या १ सय ५२ पुगेको छ । दुवै पुस्तकको मूल्य एक–एक सय रुपियाँ राखिएको छ ।
कार्यक्रममा शब्दयात्रा प्रकाशनका सञ्चालक सदस्य कृष्णमणि कुइँकेलले दुवै पुस्तकको परिचय गराउनुभएको थियो भने कवयित्री किरण त्रिपाठी पन्तले कवितासङ्ग्रहमा सङ्कलित एउटा कविता वाचन गर्नुभएको थियो ।
‘शङ्खमूल माहात्म्य र कुम्भेश्वर महादेव’ नामक पुस्तकको बिक्रीबाट आएको सम्पूर्ण रकम कुम्भेश्वर महादेवका विषयमा शोध गर्ने शोधार्थीलाई लेखनवृत्तिका रूपमा प्रदान गरिने भएको छ ।
दुई पुस्तक सार्वजनिक
