शब्दयात्रा प्रकाशनद्वारा प्रकाशित पाँच कृति सार्वजनिक गरिएका छन् । प्रकाश श्रेष्ठद्वारा लिखित गद्यकवितासङ्ग्रह ‘यस्तो मोडमा’ लाई लेखक तथा पूर्वप्रशासक चन्द्रबहादुर खड्का र शिक्षासेवी प्रा. केदारनाथ श्रेष्ठले संयुक्त रूपमा सार्वजनिक गर्नुभयो । प्रकाश उज्ज्वल बनेपाद्वारा लिखित ‘नेवाः सभ्यताका केही संस्कार–संस्कृति’ लाई पूर्वप्रशासक तथा लेखक डा. इन्दुल केसी र सञ्चारकर्मी शिव बन्जाराले तथा दामोदर घिमिरेद्वारा लिखित ‘नीलकण्ठेश्वर धाम र कृष्णमणि कुइकेल’ लाई साहित्यकारद्वय लीलादेवी श्रेष्ठ र अच्युत अधिकारीले संयुक्त रूपमा सार्वजनिक गर्नुभयो । तीनैवटा कृति पहिलो संस्करणका रूपमा प्रकाशन गरिएका हुन् ।
यसै गरी बलदेव थापाद्वारा लिखित ‘‘बा’ को वाम’ (ऐतिहासिक परिचय) लाई लेखकका छोरा उद्धव थापा र बहिनी गायत्री थापाले तथा ‘कुराको सास्ती’ (व्यङ्ग्यकवितासङ्ग्रह) लाई लेखककी छोरी उषा थापा र कवि मुरहरि रायमाझी ‘हरि’ ले संयुक्त रूपमा सार्वजनिक गर्नुभयो । दुवै पुस्तक दोस्रो संस्करणका रूपमा प्रकाशन गरिएका हुन् ।
शब्दयात्रा प्रकाशनको सभाकक्षमा फागुन २४ गते आयोजित सार्वजनिकीकरण कार्यक्रममा कृतिकारहरूले आआफ्ना कृतिका बारेमा जानकारी गराउनुभएको थियो । सार्वजनिक गरिएका कृतिहरूमध्ये ‘यस्तो मोडमा’ र ‘नेवाः सभ्यताका केही संस्कार–संस्कृति’ को पूरै पाठ संस्थाको वेबसाइटमा कृतिकारको नाम टाइप गरेर पढ्न सकिने व्यवस्था पनि गरिएको छ ।
यी पुस्तकहरूसमेत शब्दयात्रा प्रकाशनद्वारा प्रकाशित पुस्तकहरूको सङ्ख्या २७० पुगेको छ । शब्दयात्रा प्रकाशनद्वारा प्रकाशित सम्पूर्ण पुस्तकहरूको विशेषताका बारेमा संस्थाको वेबसाइटबाट थाहा पाउन सकिन्छ ।