शब्दयात्रा प्रकाशनद्वारा उत्पादित विभिन्न गानहरूमा स्वर दिने ६ जना गायक–गायिकालाई बुद्धजयन्तीको अवसरमा आभारपत्र समर्पण गरिएको छ । ती गानहरू अक्षरधाम यु–ट्युब च्यानलबाट सुन्न सकिन्छ । हरि मञ्जुश्रीको सङ्गीत र मच्छेश्वर सापकोटाको सुपरिवेक्षण रहेका गानहरूमा शब्दयात्रा प्रकाशनका सदस्यहरूका साथै सदस्य नभएर पनि शब्दयात्रा प्रकाशनलाई सघाउन ६ जना गायक–गायिकाले स्वराङ्कन गराउनुभएको हुनाले त्यसरी सहयोग गर्ने गायक–गायिकालाई आभारपत्र समर्पण गरिएको हो । शब्दयात्रा प्रकाशनको गानमा आफ्नो स्वर दिएर सघाउने गायक–गायिकाहरू अनिशा तामाङ, अनीश कुइकेल, अम्बिका थापा, बबिता प्याकुरेल, रिभव सेवाचार्य र सरस्वती सापकोटा हुनुहुन्छ ।
गायक–गायिकाप्रति औपचारिक आभार व्यक्त गर्ने क्रममा गजलकार नवराज दाहाल ‘उत्साही’ ले रुद्राक्षमाला, कवि हरि कोर्कालीले उपहार र स्वामी कल्याणमित्रले प्रमाणपत्र समर्पण गर्नुभएको थियो । कार्यक्रममा उपस्थित हुन नसक्नुभएका गायक–गायिकामध्ये अम्बिका थापाको आभारपत्र दामोदर घिमिरेले, बबिता प्याकुरेलको आभारपत्र अनीश कुइकेलले र रिभव सेवाचार्यको आभारपत्र अनिशा तामाङले ग्रहण गर्नुभएको थियो । त्यस क्रममा गीतिभास्कर तथा सङ्गीत क्षेत्रका प्रथम सुपरिवेक्षक मच्छेश्वर सापकोटाले आभारपत्र प्राप्त गर्ने गायक–गायिकाको गायनकलाका विषयमा जानकारी गराउनुभएको थियो ।