काभ्रेपलाञ्चोक जिल्लामा २०३८ सालमा जन्मेर विभिन्न साहित्यिक कृतिको सिर्जना र साहित्यिक पत्रिकाको सम्पादन गरेकी, साहित्यिक संस्था र विद्युतीय सञ्चार माध्यम सञ्चालन गरेकी र श्रीमानको निधनपछि पनि नेपालको मौलिक छन्दलय ‘झ्याउरे’ लाई पुनर्जागरण गराएर अन्तर्राष्ट्रिय व्याप्ति दिने अभियानमा संलग्न रहेकी कर्मशील महिला रेणुका भट्टराई ‘मञ्जरी’ लाई २०८२ सालको ‘शब्दयात्रा सूर्यप्रसाद श्रेष्ठ कर्मशीलता पुरस्कार’ समर्पण गरिएको छ । पुरस्कार समर्पण गर्ने क्रममा गायक सत्यनारायण मानन्धरले अभिवन्दनापत्र, शब्दयात्रा प्रकाशनका अध्यक्ष हरि मञ्जुश्रीले शब्दयात्रा पट्ट, कोष व्यवस्थापकका तर्फबाट शिक्षासेवी शङ्करप्रसाद मानन्धरले भेटी, शिक्षासेवी रामप्रसाद अधिकारीले उपहार र पत्रकार शिव बन्जाराले माला समर्पण गर्नुभएको छ । पुरस्कारको कोष व्यवस्थापन पूर्वराजदूत तथा पूर्व प्रमुख निर्वाचन आयुक्त सूर्यप्रसाद श्रेष्ठले गर्नुभएको हो ।
