हे प्रभु ! तिमी छौ सबमा व्याप्त, भन तिमी नै लौ म के चढाऊँ ।
आँसु छ तिम्रै, रोदन तिम्रै, चर्चर चिरिने छाती तिम्रै
छैन कुनै पनि तिमीभन्दा पर, हे प्रभु ! तिमीमा म के चढाऊँ ।
जसले दिन्छन् लात र घात, तिनमा पनि ता बास छ तिम्रै
जे म चढाउँछु त्यो तिमी नै हौ, हे प्रभु ! तिमीमा म के चढाऊँ ।
धोका, कष्ट र पीडा तिम्रै, मुटु दुख्ने सब घटना तिम्रै
तिमीसँग नहुने के छ र अर्को, हे प्रभु ! तिमीमा म के चढाऊँ ।
दिने तिमी नै, लिने तिमी नै, हेला र घृणा, ईष्र्या तिम्रै
जीत र हार दुवै तिमीमा, हे प्रभु ! तिमीमा म के चढाऊँ ।
ममता, स्नेह र माया तिमी नै, व्यथित हृदयको घाउ तिम्रै
देखिनँ मैले भिन्न कुनै पनि, हे प्रभु ! तिमीमा म के चढाऊँ ।
