स्नातकोत्तर तहमा ठाडोभाका लोकगीतका विषयमा शोधकार्य गरेकी र लोकदोहोरी गायनमा पनि सक्रिय रहेकी गायिका तथा शिक्षिका विष्णु परियार (लमजुङ) मा शब्दयात्रा प्रकाशनले २०८२ सालको ‘शब्दयात्रा मैया खड्का सारस्वत सम्मान’ समर्पण गर्ने भएको छ । आध्यात्मिक लेखक ओतबहादुर खड्काद्वारा आफ्नी धर्मपत्नीको स्मृति र सम्मानमा कोष व्यवस्थापन गरिएको यो सम्मान आगामी वैशाख ५ गते शनिबार शब्दयात्रा प्रकाशनको सभाकक्षमा आयोजना हुने कार्यक्रममा समर्पण गरिनेछ । सम्मान ग्रहण गर्न स्वीकृति प्रदान गर्नुभएकोमा शिक्षिका तथा गायिका विष्णु परियारप्रति शब्दयात्रा प्रकाशन हार्दिक आभार प्रकट गर्दछ ।

शब्दयात्रा प्रकाशनको आयोजनामा यही चैत १४ गते शनिबार सम्मान समर्पण तथा पुस्तक र गान सार्वजनिकीकरण कार्यक्रम सम्पन्न गरियो । कार्यक्रममा विभिन्न सात विधाका सम्मान सातजना राष्ट्रिय प्रतिभामा समर्पण गरियो भने एउटा पुस्तक र एउटा गान सार्वजनिक गरियो । कार्यक्रमको सञ्चालन हरि मञ्जुश्रीबाट र समापन प्रा. डा. हेमाङ्गराज अधिकारीबाट गरिएको थियो । कालिका त्रिपाठी पन्तको सभापतित्वमा सम्पन्न उक्त कार्यक्रममा सरस्वती सापकोटाले समुद्घाटन, केदारनाथ तिमल्सिनाले रुद्राक्षमाला अर्पण, अमृत अधिकारीले छायाङ्कन तथा स्वराङ्गन र निर्मला श्रेष्ठले सम्मान सामग्रीको व्यवस्थापन गर्नुभएको थियो । गोपाल पराजुली, जयदेव अधिकारी, पद्मकला–भीमप्रसाद सुवेदी र रुद्रलाल शर्मा धितालको तस्बिरमा पुष्पार्पण गरिएको उक्त कार्यक्रममा चयन समितिका सदस्यहरूलाई लोकेन्द्र ढकालले उपहार समर्पण गर्नुभएको थियो । नवराज दाहाल ‘उत्साही’ ले सार्वजनिक गरिएको कृतिको व्यवस्थापन गर्नुभएको थियो भने शैलेन्द्र सिम्खडाले हास्यव्यङ्ग्य कविता प्रस्तुत गर्नुभएको थियो । कार्यक्रममा डा. नारायणप्रसाद खनाल, चन्द्रप्रसाद न्यौपाने, लक्ष्मी उप्रेती, बालिका गिरी, जीतबहादुर श्रेष्ठ, उर्मिला ढुङ्गाना सुवेदी र अकुर शाहले शब्दयात्रा प्रकाशन पुस्तकालयका लागि पुस्तकहरू उपहार प्रदान गर्नुभएको थियो र पुस्तकालयका तर्फबाट हरिगोपाल प्रधान, शिव बन्जारा र प्रजापति तिमिल्सिनाले ती पुस्तकहरू ग्रहण गर्नुभएको थियो ।

डा. इन्दुुल केसीद्वारा लिखित ‘हरि मञ्जुश्रीका जागरण गान’ नामक पुस्तक यही चैत १४ गते शनिबार सार्वजनिक गरिएको छ । कृतिकार डा. इन्दुल केसी र अनुसन्धाता लालबहादुर भुजेलले उक्त पुस्तक संयुक्त रूपमा सार्वजनिक गर्नुभएको हो । सार्वजनिकीकरण कार्यक्रम शब्दयात्रा प्रकाशनको सभाकक्षमा भएको थियो । ‘हरि मञ्जुश्रीका जागरण गान’ शब्दयात्रा प्रकाशनद्वारा प्रकाशित २७१ औँ पुस्तक हो । कार्यक्रममा कृतिकार डा. इन्दुल केसीले कृति र कृतिनायकका बारेमा बताउनुभएको थियो ।

शब्दयात्रा प्रकाशनले यही चैत १४ गते शनिबार सम्मान समर्पण समारोहको आयोजना गर्ने भएको छ । समारोहमा डा. हेमाङ्गराज अधिकारी (भोजपुर), रामबाबु सुवेदी (कास्की), डा. नारायणप्रसाद खनाल (प्युठान), चन्द्रप्रसाद न्यौपाने (सिन्धुपाल्चोक), शैलेन्द्र सिम्खडा (धादिङ), लालबहादुर भुजेल (लमजुङ) र साहित्यिक पत्रिका ‘वनिता’ (मोरङ) लाई सम्मान समर्पण गरिनेछ । उक्त कार्यक्रममा एउटा आध्यात्मिक गान र एउटा पुस्तक सार्वजनिक पनि गरिनेछ । कार्यक्रम बनेपामा अवस्थित शब्दयात्रा प्रकाशनको सभाकक्षमा दिउँसो १२ः३० बजे प्रारम्भ गरिनेछ ।