लेखक दामोदर घिमिरेले आफ्ना मातापिताको स्मृति र सम्मानमा कोष व्यवस्थापन गर्नुभएको ‘शब्दयात्रा दुर्गादेवी–मेदनीप्रसाद घिमिरे पुरस्कार, २०८२’ खोटाङ जिल्ला ऐसेलुखर्क गाउँपालिका वडा नं. ४ दिब्दी निवासी उद्यमी एन्जिला तामाङमा समर्पण गरिएको छ । पुरस्कारको राशी ५ हजार ५ सय रुपियाँ छ । आफ्नै गाउँमा २०७१ सालदेखि ढाका कपडा उद्योग खोली सञ्चालन गर्नुका साथै विभिन्न व्यक्तिलाई सीपमूलक तालिम दिई रोजगार बन्न सघाउनुभएको र कुखुरापालन व्यवसाय पनि गरेर प्रेरणादायी उद्यमी महिला बन्न सफल बन्नुभएकोेमा उहाँमा यो पुरस्कार समर्पण गरिएको हो । शब्दयात्रा प्रकाशनको सभाकक्षमा आयोजित कार्यक्रममा उहाँका तर्फबाट उपस्थित केशरमाया तामाङलाई हरि मञ्जुश्रीले रुद्राक्षमाला र उपहार, कोष व्यवस्थापक दामोदर घिमिरेले पुरस्कारको राशी र डा. कुलप्रसाद कोइरालाले पुरस्कारको प्रमाणपत्र हस्तान्तरण गर्नुभएको थियो ।

विपत्तिमा परेका, अशक्त र पीडित साहित्यकार, कलाकार र पत्रकारलाई आर्थिक सहयोग गर्न शब्दयात्रा प्रकाशनले अक्षरसेवी सहयोग कोषको व्यवस्था गरेको छ । त्यस कोषमा कसैले अक्षयकोषको व्यवस्था गरिदिएर अनि कसैले पटक–पटक रकम जम्मा गरिदिएर सहयोग गर्नुभएको छ । त्यस्तो सहयोग गर्नेहरूमा खोटाङ जिल्लाका प्रतिभा लेखक तथा सम्पादक दामोदर घिमिरे र उहाँका भाइ लीलानाथ घिमिरे पनि हुनुहुन्छ । उहाँहरूले नियमित रूपमा सहयोग गर्नुभएको छ । यही वैशाख ५ गते पनि दामोदर घिमिरेले दिनको ५ रुपियाँ ५५ पैसाका दरले २ वर्षको ४ हजार रुपियाँ र लीलानाथ घिमिरेले दिनको १० रुपियाँका दरले २ वर्षको ७ हजार ३ सय रुपियाँ गरी जम्मा ११ हजार ३ सय रुपियाँ प्रदान गर्नुभएको छ । सो रकमको चेक उहाँहरूका तर्फबाट निर्मला भण्डारीले प्रदान गर्नुभयो र शब्दयात्रा प्रकाशनका तर्फबाट संरक्षण समितिको अध्यक्षका रूपमा हरि मञ्जुश्रीले ग्रहण गर्नुभयो । विपत्तिमा परेका, अशक्त र पीडित साहित्यकार, कलाकार र पत्रकारलाई आर्थिक सहयोग गर्नका लागि उहाँहरूले देखाउनुभएको यस्तो उदारता र सहयोगका लागि शब्दयात्रा प्रकाशन उहाँहरूप्रति हार्दिक आभार प्रकट गर्दछ ।

भोजपुर जिल्लाको दिङ्ला गहतेमा जन्मेका लोकगायक नीलमणि भण्डारीलाई शब्दयात्रा प्रकाशनले १० हजार रुपियाँ आर्थिक सहयोगसहित सम्मानपत्र समर्पण गरेको छ । उहाँले धेरैवटा गीत, भजन र कवितामा आफ्नो स्वर, शब्द र शिल्प दिनुभएको छ । उहाँ शारीरिक रूपमा अशक्त तथा बौद्धिक र मानसिक रूपमा सशक्त हुनुहुन्छ । शब्दयात्रा प्रकाशनले उहाँजस्तै साहित्यकार, कलाकार र पत्रकारलाई आर्थिक सहयोग गर्न अक्षरसेवी सहयोग कोष खडा गरेको छ । सो कोष अन्तर्गतको अक्षयकोषमा धुलिखेलनिवासी केशव खुलाल क्षत्रीले पनि आफ्ना पिता टीकाबहादुर खुलाल क्षत्री र माता रमाकुमारी खुलाल क्षत्रीको स्मृति र सम्मानमा अक्षयकोषको स्थापना गर्नुभएको छ । उक्त कोषको ब्याजबाट लोकगायक नीलमणि भण्डारीमा आर्थिक सहयोगसहित सम्मानपत्र समर्पण गरिएको हो । उहाँमा समर्पण गरिएको सम्मानपत्रमा कोष व्यवस्थापक केशव खुलाल क्षत्री, शब्दयात्रा प्रकाशनको संरक्षण समितिका अध्यक्ष हरि मञ्जुश्री र प्रथम साङ्गीतिक सुपरिवेक्षक गीतिभास्कर मच्छेश्वर सापकोटाको हस्तखत रहेको छ । सम्मान गर्ने क्रममा रुद्राक्षमाला र उपहार हरि मञ्जुश्रीले, भेटी रकम कोष व्यवस्थापकका तर्फबाट पूर्वप्रशासक तथा लेखक जयनारायण नेपालले र सम्मानपत्र नेपाल संस्कृत विश्वविद्यालयका पूर्वउपकुलति प्रा. डा कुलप्रसाद कोइरालाले समर्पण गनुर््भएको थियो । अक्षरसेवी सहयोग कोषबाट यसअघि विभिन्न लेखक, पत्रकार, कलाकारलाई ८६ हजार रुपियाँ आर्थिक सहयोग गरिसकिएको छ ।