शब्दयात्रा प्रकाशनबाट हरेक वर्षको जेठ महिनामा समर्पण गर्ने सम्मानहरू २०७३ साल जेठमा पनि समर्पण गरिने भएकाले सम्मानयोग्य व्यक्ति वा संस्थाको नाउँ कारणसहित आगामी वैशाख १५ गतेभित्र प्राप्त हुने गरी पठाइदिन शब्दयात्रा प्रकाशनले सबैमा अनुरोध गरेको छ ।
जेठ महिनाको दोस्रा साता समर्पण गरिने प्रशासनिक महिला प्रतिभा सम्मानका लागि सचिवदेखि शाखा अधिकृतसम्मको प्रशासनिक कर्मचारी भएर पनि अर्को कुनै विधामा दक्षता देखाइसकेकी महिला हुनुपर्ने, राष्ट्रिय गजल सम्मानका लागि गजल विधाका लागि उत्कृष्ट योगदान पु¥याएको हुनुपर्ने, शब्दयात्रा सिर्जना सम्मानका लागि २०७२ सालभरिमा शब्दयात्रा प्रकाशनद्वारा प्रकाशित १७ वटा पुस्तकहरूमध्ये सर्वोत्तम लागेको हुनुपर्ने र शोध सम्मानका लागि कवि नन्दिकेश्वर अधिकारी वा उनका वंशज लेखकका विषयमा शोध गरेको हुनुपर्ने कुरा शब्दयात्रा प्रकाशनले जनाएको छ ।
उल्लिखित सम्मानहरू गत वर्ष शैलजा रेग्मी भट्टराई, बूँद राना, अनन्त कोइराला र गोपाल पराजुली सम्मानित भएका थिए । ती सम्मानहरूको आर्थिक व्यवस्थापन उर्मिला श्रेष्ठ भोजपुरे, रुक्मिणी सिग्देल, कल्याण लम्साल र गीता मञ्जुश्रीले गर्नुभएको छ ।

शब्दयात्रा प्रकाशनद्वारा प्रकाशित ५९ औँ पुस्तक ‘चिन्ताकुल’ लाई चैत ५ गते बनेपामा आयोजित समारोहमा सार्वजनिक गरियो । प्रमुख अतिथिका रूपबाट एसएसपी रमेश खरेल र साहित्यिक पत्रकार मोहन दुवालले संयुक्त रूपमा उक्त पुस्तक सार्वजनिक गरेका थिए ।
बनेपाली प्रतिभा त्रिकालदर्शी भैलद्वारा लिखित पहिलो पुस्तक ‘चिन्ताकुल’ मा लेखकले पूर्वराजा वीरेन्द्रले मरणोपरान्त देशवासीका नाममा सम्बोधन गरेको कल्पना गरी देशको विषयवस्तुका बारेमा आफ्नो चासो र चिन्ता प्रकट गरेका छन् ।
हरि मञ्जुश्रीको मन्तव्य रहेको उक्त पुस्तक ६४ पृष्ठको छ । नेपालसुधार भैलका छोरा त्रिकालदर्शी भैल अमेरिकाको बोस्टनमा व्यवसाय गरी बस्छन् ।

नेपालभूमि साप्ताहिकका स्तम्भकार दामोदर घिमिरेले शब्दयात्रा प्रकाशनद्वारा विपत्तिपीडित नेपाली लेखक–पत्रकारहरूको आर्थिक सहयोगार्थ सञ्चालित अक्षरसेवी सहयोग कोषलाई गत माघ १ गतेदेखि लागू हुने गरी नियमित रूपमा दैनिक ५ रुपियाँ ५५ पैसाका दरले आर्थिक सहयोग गरिरहने घोषणा गरेका छन् ।
घोषणा गरेलगत्तै उनले ५०० रुपियाँ पनि उपलब्ध गराएका छन् ।
उक्त कोषमा कवि शारदाप्रसाद शर्माले पनि दैनिक १ रुपियाँका दरले सहयोग गर्ने गर्नुभएको छ ।

शब्दयात्रा प्रकाशनद्वारा संस्थापित ‘देवीप्रसाद सापकोटा आमसञ्चार सम्मान’ बाट २०७२ सालका लागि गत फागुन २५ गते सम्मानित अग्रज पत्रकार कोशराज रेग्मीको गत चैत ४ गते विराटनगरमा निधन भएको छ । उनी झर्रोवादी आन्दोलनका प्रवर्तकमध्ये एक थिए ।
शब्दयात्रा प्रकाशन कोशराज रेग्मीको आत्मशान्तिको कामना गर्दै शोकविह्वल परिवारजनप्रति हार्दिक समवेदना व्यक्त गर्दछ ।

शब्दयात्रा प्रकाशनको आयोजनामा गत २०७२ साल फागुन २५ गते मङ्गलबार अग्रज साहित्यकार तथा समाजसेवी कमलराज रेग्मीको प्रमुख आतिथ्यमा बनेपास्थित के. एन. ब्यान्क्वेटमा विशेष समारोह सम्पन्न भयो । प्रमुख अतिथिको स्वास्थ्यस्थिति अचानक खराब हुन गएकाले अग्रज समाजसेवी बेलप्रसाद श्रेष्ठ कार्यवाहक प्रमुख अतिथि हुनुभएको उक्त समारोहमा नैपालका शैक्षिक शिरोभूषण काठमाडौँ विश्वविद्यालयका संस्थापक उपकुलपति डा. सुरेशराज शर्मा विशेष अतिथि हुनुहुन्थ्यो । समारोहमा सम्मान समर्पण, पुस्तकको सार्वजनिकीकरण र विविध गरी तीन प्रकारका कार्यक्रमहरू गरिएका थिए ।
कार्यक्रममा अग्रज कवि प्रह्लाद पोखरेलले कविता वाचन गर्नुभएको थियो भने शब्दयात्रा प्रकाशनद्वारा सञ्चालित ‘शब्दसञ्चार’ रेडियो कार्यक्रमका प्रस्तोता शिव बन्जाराले स्वागत भाषण गर्नुभएको थियो । गोसाइँस्थान नैमिषारण्य क्षेत्र विकास समितिद्वारा सञ्चालित नैमिषारण्य गुरुकुलका वटुकहरूद्वारा पदमनाथ ढुङ्गानाको संयोजकत्वमा स्वस्तिवाचन गरिएको उक्त समारोहमा शब्दयात्रा पत्रकार समाजका सभापति रामचन्द्र हुमागाईंले उपहारहरू प्रदान गर्नुभएको थियो । शब्दयात्रा प्रकाशनका अध्यक्ष हरि मञ्जुश्रीले सञ्चालन गर्नुभएको उक्त समारोहको सभापतित्व युवा समाजसेवी आनन्दराज श्रेष्ठले गर्नुभएको थियो । समारोहको व्यवस्थापन शब्दयात्रा प्रकाशन संरक्षण समितिका सदस्य सकुल थापा र नेपालभूमि साप्ताहिकका सम्पादक सुमन खड्काले गर्नुभएको थियो ।
कार्यक्रममा हरि मञ्जुश्रीले शब्दयात्रा प्रकाशनसँग चार प्रकारका सीडी रहेको जानकारी दिँदै इच्छा हुने महानुभावहरूले कार्यालयमा सम्पर्क राखेर लैजान सूचना गर्नुभयो । उहाँका अनुसार (क) शब्दयात्रा प्रकाशनको रेडियो कार्यक्रम ‘शब्दसञ्चार’ को एक वर्षको सीडी तयार पारिएको छ । (ख) शब्दयात्रा पत्रकार समाजको आयोजनामा सम्पन्न देउसी–भैलो कार्यक्रमको सीडी पनि तयार पारिएको छ । (ग) शब्दयात्रा सम्मान व्यवस्थापक समाजका सदस्य बालसाहित्यकार गोपाल पराजुलीका विषयमा वृत्तचित्र तयार पारिएको छ । (घ) ‘नेपालभूमि’ का स्तम्भकार इन्जिनियर दिनेश चौधरीसँग सम्बन्धित भूकम्पप्रतिरोधी नेपाली घरका विषयमा पनि सीडी तयार पारिएको छ ।
उहाँले ‘स्वर्गमा पैदल’ यात्राकृतिका विषयमा शिव बन्जाराले ‘शब्दसञ्चार’ रेडियो कार्यक्रमका लागि डा. सुरेशराज शर्मासँग लिएको अन्तर्वार्ता ‘शब्दसञ्चार’ टाइप गरेपछि युट्युबमा सुन्न सकिने जानकारी पनि गराउनुभयो ।

सम्मान समर्पण कार्यक्रमअन्तर्गत २०७२ सालको फागुन महिनामा शब्दयात्रा प्रकाशनद्वारा समर्पण गरिने विभिन्न चार विधाका सम्मानहरू २०७२ सालका लागि त्यसै दिन समर्पण गरियो । कार्यक्रममा नेपालमा विज्ञान–प्रविधिको विकास गर्न विभिन्न कार्यक्रमहरू गर्ने क्रममा शिक्षा र गणित विधामा अन्वेषणात्मक पुस्तकहरू लेखेर त्यसलाई विज्ञान–प्रविधिको विकासका लागि उपयोग गराउन नेपाल विज्ञान तथा प्रविधि प्रज्ञाप्रतिष्ठान र कलेजमार्फत अहम् भूमिका खेल्नुभएको विशिष्ट योगदानको सम्मानस्वरूप शब्दयात्रा विज्ञान–प्रविधि सम्मानबाट नेपाल विज्ञान तथा प्रविधि प्रज्ञाप्रतिष्ठानका पूर्वउपकुलपति डा. होमनाथ भट्टराई (अर्घाखाँची) लाई सम्मानित गरियो । देवीप्रसाद सापकोटा आमसञ्चार सम्मानबाट नेपालको पत्रकारिता क्षेत्रले स्वाभिमानपूर्वक कर्तव्यपालन गर्न नसकिरहेको परिस्थितिमा युगीन जिम्मेवारीलाई स्वीकार गर्दै आमसञ्चारका क्षेत्रमा ऐतिहासिक भूमिका निर्वाह गरेर ‘जनवार्ता’ पत्रिकाबाट पत्रकारिताको मूल मर्म र कर्मको उदाहरण नेपाली समाजमा प्रस्तुत गर्नुभएका अग्रज पत्रकार श्री कोशराज रेग्मी (विराटनगर) लाई सम्मानित गरियो । यसै गरी हंसराज श्रेष्ठ सामाजिक जागरण सम्मानबाट तनहूँमा गाउँ सेवा कोषको स्थापना र सञ्चालनलगायत विभिन्न संस्थाहरूमार्फत सामाजिक सेवाका क्षेत्रमा लामो समयदेखि आफूलाई संलग्न बनाउँदै समाजको सकारात्मक रूपान्तरणका दिशामा मानवीय कर्तव्य निर्वाह गरेर सामाजिक जागरणका क्षेत्रमा उदाहरणीय आदर्श बन्नुभएका अग्रज समाजसेवी श्री भीमबहादुर अधिकारी (तनहूँ) लाई सम्मानित गरियो भने होम–तोत्र शिक्षा सम्मानबाट पूर्वीय आदर्शअनुरूपको गुरुकुलीय शिक्षापद्धति अवलम्बन गरी देशका विभिन्न भागबाट आएका शिक्षार्थीहरूलाई निःशुल्क भोजन र आवाससहित योग्य शिक्षार्थीलाई आचार्यसम्मको शिक्षा दिलाएर देशको आदर्श एवं अनुकरणीय गुरुकुल बन्न सफल बनेकोमा देशप्रतिको यस्तो गहन कर्तव्य–निर्वाहको सम्मानस्वरूप श्री महेश संस्कृत गुरुकुल (देवघाट) लाई सम्मानित गरियो । सम्मानका रूपमा हरेकलाई पुस्तक उपहार, किरीट, ५–५ हजार रुपियाँ र अभिवन्दनापत्र समर्पण गरिएको थियो ।
श्री कोशराज रेग्मी शारीरिक अस्वस्थताका कारण विराटनगरबाट आउन नसक्नुभएकाले उहाँका तर्फबाट उहाँका सुपुत्र राघवराज रेग्मीले र श्री महेश संस्कृत गुरुकुलका तर्फबाट रामप्रसाद भण्डारीले सम्मान ग्रहण गर्नुभएको थियो । सम्मानित व्यक्तित्व चयन समितिका सदस्य बद्रीप्रसाद शर्माले चयन प्रक्रियाका बारेमा बोल्नुभएको थियो ।

पुस्तकको सार्वजनिकीकरण कार्यक्रमअन्तर्गत माटो (पोष चापागाईंको नियात्रासङ्ग्रह), सुशील कोइराला अरूको दृष्टिमा (हरि मञ्जुश्रीद्वारा सम्पादित कृति), नेपाल कम्पन (नवीना श्रेष्ठको लघुकाव्य), नेपाल माहात्म्य (ओतबहादुर खड्काद्वारा अनूदित कृति), मुरहरि रायमाझीका गजलहरू (मुरहरि रायमाझीको गजलसङ्ग्रह) र ‘नेपालभूमि’ को वार्षिक अङ्क (प्र. सं. रामचन्द्र हुमागाईं, सं. सुमन खड्का) लाई सार्वजनिक गरियो । यी सबै कृतिहरू शब्दयात्रा प्रकाशनबाट प्रकाशित भएका हुन् । यीसमेत शब्दयात्रा प्रकाशनबाट प्रकाशित भएका कृतिहरूको सङ्ख्या ५८ पुगेको छ ।
सार्वजनिक गरिएका कृतिहरूमाथि साहित्यकारद्वय गोपाल पराजुली र हरिगोपाल प्रधानले टिप्पणी गर्नुभएको थियो । कृतिकारहरूका तर्फबाट नवीना श्रेष्ठले मन्तव्य व्यक्त गर्नुभएको थियो भने मुरहरि रायमाझीले गजल सुनाउनुभएको थियो ।

विविध कार्यक्रमअन्तर्गत शब्दयात्रा प्रकाशनको वेभसाइट www.sypublication.com.np को शुभारम्भ गरियोे । शब्दयात्रा प्रकाशनका हरेक गतिविधिहरू अब वेभसाइटमा पनि पढ्न पाइने भएको छ ।
यसै गरी नेपाली सर्जकहरूको अन्तर्राष्ट्रिय सन्जाल विस्तार गर्नका लागि हरेक सर्जकको छुट्टाछुट्टै ब्लग निर्माण गर्न थालिएको जानकारी पनि दिइयो । वेभसाइट र ब्लगको प्रयोग गरी शब्दयात्रा प्रकाशनसँग आबद्ध हरेक सर्जक विश्वभरिका सर्जकहरूसँग मिसिन सक्ने कुरा पनि बताइयो ।

विविध कार्यक्रमअन्तर्गत शब्दयात्रा घुम्ती पुस्तक पसलको उद्घाटन गरियो । शब्दयात्रा प्रकाशनद्वारा प्रकाशित र शब्दयात्रा प्रकाशनसँग सम्बद्ध सर्जकहरूका सिर्जनाहरू बिक्री–वितरण गर्नका लागि उक्त घुम्ती पुस्तक सञ्चालन गर्न थालिएको हो । पुस्तक पसल सञ्चालन गर्ने जिम्मा जगन्नाथ दाहाललाई दिइएको छ । काभ्रे जिल्लामा घुम्ती पुस्तक पसलको शुभारम्भ गर्ने साहित्यिक संस्था शब्दयात्रा प्रकाशन बन्न पुगेको छ ।
शब्दयात्रा प्रकाशनद्वारा पाठकहरूको सुविधाका लागि सञ्चालित शब्दयात्रा घुम्ती पुस्तक पसलले हरेक पुस्तकको मूल्यमा १० प्रतिशत छुट दिने व्यवस्था गरेको छ ।

‘नेपालभूमि’ (विचारप्रधान राष्ट्रिय साप्ताहिक पत्रिका) मा २०७१ फागुनदेखि २०७२ फागुनसम्मको १ वर्षभित्र १० वटाभन्दा बढी लेखरचनाहरू उपलब्ध गराउने लेखकहरूलाई उक्त समारोहमा स्मृतिचिह्न अर्पण गरियो ।
त्यस्ता लेखकहरूमा डा. सुरेशराज शर्मा, डा. गोपाल शिवाकोटी, पोष चापागाईं, गोपाल पराजुली, मुकुन्दप्रसाद उपाध्याय, अनुपम ढुङ्गेल, सेनन पौडेल, कृष्णविनोद शर्मा, भार्गव उपाध्याय, युवराज शर्मा, रवि हुमागाईं, राम घिसिङ, रश्मि मञ्जुश्री, रोशन मञ्जुश्री, गोविन्दबहादुर खड्का, दामोदर घिमिरे, दिनेश चौधरी, भवानी पाण्डे, सविता शर्मा र अनिता भण्डारी गरी २० जना हुनुहुन्थ्यो ।