शब्दयात्रा प्रकाशनले ‘सत्यनारायण व्रतकथा’ नामक नेपाली भाषामा अनूदित काव्य प्रकाशन गरेको छ । काव्यमा ‘हरितालिका व्रतकथा’ को काव्यात्मक अनुवाद पनि समावेश गरिएको छ ।
काभ्रे जिल्लाका महाकाव्यकार कविप्रसाद प्याकु¥यालले संस्कृत भाषाबाट नेपाली भाषामा काव्यात्मक अनुवाद गर्नुभएको उक्त पुस्तक काव्यकारकै अर्को नाम श्रीधर उपाध्याय भन्ने नामबाट प्रकाशन गरिएको छ ।
जम्मा ४० पृष्ठको उक्त पुस्तकको मूल्य ७० रुपियाँ राखिएको छ । आगामी जेठ महिनामा शब्दयात्रा प्रकाशनबाट आयोजना गरिने सम्मान समर्पण तथा पुस्तक सार्वजनिकीकरण समारोहमा उक्त पुस्तकलाई सार्वजनिक गरिनेछ ।
श्रीधर प्याकु¥यालले यसअघि हेलम्बू (लघुकाव्य), भरतेन्दु (महाकाव्य), बेलप्रसाद (नव्यकाव्य), तिमीलाई नमोनमः (कवितासङ्ग्रह), अपरोक्ष अनुभूति (भावानुवाद), वन्दे नेपाल मातरम् (महाकाव्य) र मधुत्रयी (यात्राकाव्य) गरी सातवटा काव्यकृति लेखी प्रकाशन गराइसक्नुभएको छ । ‘सत्यनारायण व्रतकथा’ उहाँको आठौँ कृति हो । उहाँले लेखेका तर प्रकाशन हुन बाँकी रहेका कृतिहरू पनि प्रशस्तै छन् ।
‘सत्यनारायण व्रतकथा’ समेत शब्दयात्रा प्रकाशनबाट प्रकाशित पुस्तकहरूको सङ्ख्या ६४ पुगेको छ ।

नेपालभूमि (विचारप्रधान राष्ट्रिय साप्ताहिक पत्रिका) का संस्थापक प्रधानसम्पादक तथा शब्दयात्रा पत्रकार समाजका सभापति रामचन्द्र हुमागाईंलाई मातृशोक परेको छ । उहाँकी माता खिलकुमारी हुमागाईंको गत वैशाख १७ गते राति १० बजेर २० मिनेट जाँदा देहावसान भएको थियो । उहाँ ९० वर्षकी हुनुहुन्थ्यो ।
खिलकुमारी हुमागाईं विगत केही समयदेखि शारीरिक रूपमा अस्वस्थ हुनुहुन्थ्यो । विभिन्न अस्पतालहरूमा उपचार गराउँदा पनि स्वस्थ हुन नसकेपछि अन्ततः उहाँलाई काठमाडौँको पाशुपत क्षेत्रमा पुयाइएको थियो । त्यहीँ उहाँले आफ्नो देहलाई विसर्जन गर्नुभएकाले नजिकैको आर्यघाटमा उहाँको भौतिक देहलाई दाहसंस्कार गरिएको थियो ।
रामचन्द्र हुमागाईं पूर्वीय सांस्कृतिक विधानअनुरूप बानेश्वर पूजा प्रतिष्ठानको क्रियाभवनमा बस्नुभएको छ ।
खिलकुमारी हुमागाईंको आत्माले चिरशान्ति प्राप्त गरोस् भन्ने कामना गर्दै शब्दयात्रा प्रकाशन, शब्दयात्रा पत्रकार समाज तथा नेपालभूमि साप्ताहिक परिवारले रामचन्द्र हुमागाईंलगायत शोकसन्तप्त परिवारजनप्रति हार्दिक समवेदना व्यक्त गरेका छन् ।

शब्दयात्रा प्रकाशनले केदारनाथ तिमल्सिनाद्वारा लिखित भजन, कविता र गीतहरूको सङ्ग्रह ‘भावनाका भुल्का’ प्रकाशन गरेको छ । उक्त पुस्तक शब्दयात्रा प्रकाशनको ६३ औँ प्रकाशनपुष्पका रूपमा केही दिनपछि नै बजारमा आउन लागेको छ ।
२००१ साल माघ १३ गते शुक्रबार काभ्रे जिल्लाको रयाले गा. वि. स. वडा नं. १ मा सामान्य किसान परिवारमा जन्मनुभएका केदारनाथ तिमल्सिना सरकारी सेवाबाट निवृत्त भई सामाजिक कार्य र साहित्यिक सिर्जना गर्दै हाल बनेपामा बसोवास गरिरहनुभएको छ । ‘भावनाका भुल्का’ उहाँको पहिलो पुस्तकाकार कृति हो ।

सिन्धुपाल्चोक जिल्लाको बाबरे — ५ मा अवस्थित जालपेश्वरी देवीस्थान परिसर खिपिङमा शिवशक्ति विराट् महायज्ञअन्तर्गत श्रीमद्भागवत ज्ञान महायज्ञको आयोजना गरियो । गत वैशाख ४ गतेदेखि प्रारम्भ गरिएको उक्त यज्ञ १२ गते समापन गरियो । भगवान् गौरीशङ्करका उपासक बाबा विश्वनाथ महाराजको समुपस्थितिमा सम्पन्न उक्त यज्ञमा पं. नवराज धितालले भागवतकथा वाचन गर्नुभएको थियो ।
उक्त यज्ञमा शब्दयात्रा प्रकाशनका अध्यक्ष साहित्यकार तथा ग्रन्थसम्पादक हरि मञ्जुश्रीलाई प्रमुख अतिथिका रूपमा आमन्त्रण गरिएको थियो । उहाँले यज्ञमा उपस्थित भक्तजनका लागि अघिल्लो दिन १ घन्टा प्रवचन गर्नुभएको थियो भने भोलिपल्ट विद्यार्थीहरूलाई नैतिक शिक्षाका विषयमा १५ मिनेटसम्म अध्यापन गराउनुभएको थियो । उहाँले शब्दयात्रा प्रकाशनका तर्फबाट त्यहाँको विद्यालयका लागि एक दर्जन पुस्तक उपहार प्रदान गर्नुभएको थियो । उहाँलाई यज्ञमा सम्मान पनि गरिएको थियो ।
प्रमुख अतिथि हरि मञ्जुश्रीसँग कान्तिपुर एफएमका तर्फबाट जनार्दन घिमिरेले त्यहाँको अनुभवका विषयमा टेलिफोनबाट संवाद गरेर प्रत्यक्ष प्रसारण गर्दा र बाबा विश्वनाथसँग यज्ञका विषयमा जानकारी लिँदा रेडियोबाट संवाद सुनिरहेका उपस्थित भक्तजनमा हाम्रो समाचार राष्ट्रिय रूपमा फैलियो भनेर खुसी छाएको थियो ।
स्थानीय शिक्षासेवी तथा समाजसेवी सुरेन्द्र प्रधानको अध्यक्षतामा गठित आयोजक समितिले उक्त यज्ञका लागि आवश्यक सम्पूर्ण व्यवस्थापन मिलाएको थियो । उहाँका अनुसार स्थानीय जनतामा नैतिक र आध्यात्मिक जागरण एवं सामाजिक एकताका लागि यस यज्ञले ठूलो सहयोग पु¥याएको छ ।

शब्दयात्रा लेखक समाज तथा शब्दयात्रा सम्मान व्यवस्थापक समाजका सदस्य कवि कल्याण लम्साललाई पत्नीशोक परेको छ । उहाँकी धर्मपत्नी श्रीमती सुमना शर्माको गत वैशाख ४ गते शनिबार बेलुका ९ बजे आफ्नै घरको शौचालयमा लडेर निधन भएको हो ।
शब्दयात्रा प्रकाशनबाट कवि लम्सालका दुईवटा कवितासङ्ग्रह प्रकाशित भएका छन् । उहाँले शब्दयात्रा सिर्जना सम्मानका लागि आर्थिक व्यवस्थापन पनि गरिदिनुभएको छ ।
शब्दयात्रा प्रकाशन कविपत्नी सुमना शर्माको गतात्माको चिरशान्तिको कामना गर्दै कवि कल्याण लम्साललगायत शोकसन्तप्त परिवारजनप्रति हार्दिक समवेदना व्यक्त गर्दछ ।

शब्दयात्रा प्रकाशनले आध्यात्मिक लेखक तथा शिक्षासेवी गोविन्दलाल प्रधानाङ्गको संयोजकत्वमा चार सदस्यीय सम्मानित व्यक्तित्व चयन समितिको गठन गरेको छ । समितिका सदस्यहरूमा उपप्राध्यापक तथा कवि खेमराज निरौला, अधिवक्ता तथा मानव–अधिकारकर्मी कृष्णप्यारी नकर्मी र समाजसेवी तथा आध्यात्मिक व्यक्तित्व पदमनाथ ढुङ्गाना रहनुभएको छ ।
आगामी जेठ महिनामा समर्पण गर्नुपर्ने चार विधाका सम्मानहरूका लागि उपयुक्त व्यक्ति वा संस्थाको चयन गर्न उक्त समितिको गठन गरिएको हो । पाठकहरूबाट प्राप्त भएका सिफारिसहरूको अध्ययन गरी उक्त समितिले सम्मानयोग्य व्यक्ति वा संस्थाको चयन गर्नेछ । शब्दयात्रा प्रकाशनले तिनैलाई सम्मान गर्नेछ ।
हरेक वर्षको जेठ महिनामा नन्दिकेश्वर अधिकारी शोध सम्मान, प्रशासनिक महिला प्रतिभा सम्मान, राष्ट्रिय गजल सम्मान र शब्दयात्रा सिर्जना सम्मान समर्पण गर्ने गरिएको छ । ती सम्मानहरूका लागि योग्य व्यक्ति वा संस्थाको नाउँ पठाउन शब्दयात्रा प्रकाशनले सार्वजनिक रूपमा आह्वान गरिसकेको छ ।

शब्दयात्रा प्रकाशनले २०७३ सालको पहिलो महिनामा नै तीनवटा पुस्तक प्रकाशित गरेको छ । त्यसमध्ये गणेशबहादुर खत्रीद्वारा लिखित ‘खुलाल खत्रीको खोज’ नामक अनुसन्धानात्मक पुस्तक भक्तपुरमा अवस्थित बागसिंह प्रतिष्ठानसागको सहकार्यमा प्रकाशन गरिएको हो । अन्य दुई पुस्तकहरूमा नेपालको प्रकाशनमा देखिएका विकृति र विसङ्गतिहरूको भण्डाफोर गरी शिवभक्त शर्माद्वारा लेखिएको उहााका अनुभव र अनुभूतिहरूको सङ्ग्रह ‘प्रशासनिक दाउपेच’ र भारत दार्जिलिङको रामकृष्ण कलेजका प्राचार्य डा. सुरेन्द्र पी. श्रेष्ठद्वारा नेपाली भाषामा लिखित ‘लैनसिंह बाङ्देलको उपन्यासकारिताको विश्लेषण र मूल्याङ्कन’ पुस्तकलाई डा. हेमराज काफ्लेद्वारा अङ्ग्रेजी भाषामा अनुवाद गरिएको कृति ‘नोभेलिस्टिक आर्टिस्ट्री अफ लैनसिंह बाङ्देल’ रहेका छन् ।
यी कृतिहरूसहित शब्दयात्रा प्रकाशनद्वारा प्रकाशित पुस्तकहरूको सङ्ख्या ६२ पुगेको छ । पछिल्ला दुई कृतिहरू आगामी जेठमा आयोजना गरिने सम्मान समर्पण तथा पुस्तक सार्वजनिकीकरण कार्यक्रममा सार्वजनिक गरिनेछन् भने अघिल्लो कृतिको सार्वजनिकीकरण बागसिंह प्रतिष्ठानले गर्ने भएको छ ।

शब्दयात्रा प्रकाशनको रेडियो कार्यक्रम ‘शब्दसञ्चार’ २०७३ सालको पहिलो सातादेखि नै हरेक हप्ता प्रसारण गर्न थालिएको छ । शब्दयात्रा प्रकाशनका शुभचिन्तक तथा सहयोगी मित्रहरूको आग्रहबमोजिम ‘शब्दसञ्चार’ लाई साप्ताहिक कार्यक्रमका रूपमा रूपान्तरण गरिएको हो । अब ‘शब्दसञ्चार’ कार्यक्रम हरेक बुधबार बेलुका ७ देखि साढे ७ बजेसम्म रेडियो एबीसी ८९.८ मेगाहर्जबाट सुन्न सकिनेछ ।
‘शब्दसञ्चार’ कार्यक्रम गत वर्ष प्रत्येक महिनाको पहिलो र तेस्रो बुधबार प्रसारण हुने गरेको थियो । उक्त कार्यक्रम शब्दयात्रा पत्रकार समाजका सचिव शिव बन्जाराले सञ्चालन गर्ने गर्नुभएको छ ।