शब्दयात्रा प्रकाशनले शब्दयात्रा प्रकाशनसँग सम्बन्धित लेखकहरूलाई विश्वको साहित्यिक सन्जालसँग जोड्ने अभियान चलाएको छ । त्यसका लागि हरेक लेखकको नाउँमा छुट्टाछुट्टै ब्लग बनाइदिन थालेको छ ।
शब्दयात्रा प्रकाशनले २०७२ साल फागुन महिनाको दोस्रो हप्तादेखि डब्लुडब्लुडब्लु डट एसवाईपब्लिकेसन डट कम डट एनपी नामक आफ्नै वेभसाइटको शुभारम्भ गरेको थियो । त्यही वेभसाइटबाट गत २०७३ साल जेठ ११ गतेदेखि शब्दयात्रा प्रकाशनसँग सम्बन्धित लेखकहरूको नाउँमा ब्लगको पनि आरम्भ गरिएको हो । त्यसै दिन सम्मान गरिएको ‘माटो’ पुस्तकका लेखक पोष चापागाईंको ब्लगबाट लेखकहरूको छुट्टाछुट्टै ब्लग बनाउन सुरु गरिएको हो । हरि मञ्जुश्रीको नाउँमा पनि ब्लग बनाइएको छ । शब्दयात्रा लेखक समाजका सदस्य बिकु लामाले उक्त जानकारी दिनुभएको हो ।
शब्दयात्रा प्रकाशनबाट पुस्तक प्रकाशन भएका कृतिकारहरूले आफ्नो नाउँको छुट्टै ब्लगको आवश्यकता महसुस गरेको भए संस्थामा सम्पर्क राख्न शब्दयात्रा प्रकाशनले अनुरोध गरेको छ । शब्दयात्रा प्रकाशनमार्फत प्रकाशन भएका कृतिहरूलाई विश्वको साहित्यिक सन्जालसँग जोड्न यसबाट ठूलो सहयोग हुने कुरा शब्दयात्रा प्रकाशनले जनाएको छ ।

काभ्रे । शब्दयात्रा प्रकाशनले २०७३ सालको जेठ महिनामा समर्पण गर्ने चार विधाका सम्मानहरू काभ्रेको बनेपामा विशेष समारोहको आयोजना गरी समर्पण गरेको छ ।
काठमाडौँ विश्वविद्यालयका रजिस्ट्रार प्रा. डा. भोला थापाले प्रमुख अतिथिका रूपबाट सम्मानित व्यक्तिहरूलाई पाँच–पाँच हजार रुपियाँ, उपहार, किरीट र अभिवन्दनापत्रबाट सम्मानित गर्नुभएको थियो ।
समारोहमा राष्ट्रिय गजल सम्मानबाट गजलकार डा. कृष्णजङ्ग राणा (बाँके, हाल ललितपुर), नन्दिकेश्वर अधिकारी शोध सम्मानबाट पत्रकार नकुल काजी (ताप्लेजुङ, हाल झापा), प्रशासनिक महिला प्रतिभा सम्मानबाट पूर्वप्रशासक तथा साहित्यकार शुभलक्ष्मी श्रेष्ठ (पाल्पा, हाल काठमाडौँ) र शब्दयात्रा सिर्जना सम्मानबाट नियात्राकार पोष चापागाईं (भोजपुर, हाल काठमाडौँ) सम्मानित हुनुभएको थियो ।
स्वामी विश्वनाथ महाराजले सभापतिका रूपबाट बोल्दै शब्दयात्रा प्रकाशनलाई भजन र सूक्तिहरू प्रकाशन गरी वितरण गर्न एक लाख रुपियाँ दिने घोषणा गर्दै पहिलो किस्ताका रूपमा २५ हजार रुपियाँ हस्तान्तरण गर्नुभएको सो समारोहमा अतिथिका रूपमा डा. गार्गी शर्माले नैमिषारण्य गुरुकुलम्लाई आभारपत्र प्रदान गर्नुभएको थियो ।
समारोहमा शिवभक्त शर्माद्वारा लिखित ‘प्रशासनिक दाउपेच’ (अनुभवसङ्ग्रह), डा. हेमराज काफ्लेद्वारा अनूदित ‘नोभेलिस्टिक आर्टिस्ट्री अफ लैनसिंह बाङ्देल’, श्रीधर प्याकु¥यालद्वारा अनूदित ‘सत्यनारायण व्रतकथा’, केदारनाथ तिमल्सिनाद्वारा लिखित ‘भावनाका भुल्का’ र रोजनाथ लुइँटेलद्वारा लिखित ‘सबैतिर कम्पनको चोट’ गरी पाँच पुस्तकलाई सार्वजनिक गरिएको थियो ।

शब्दयात्रा प्रकाशनले आगामी जेठ ११ गते मङ्गलबार बनेपामा सम्मान समर्पण तथा पुस्तक सार्वजनिकीकरण समारोहको आयोजना गर्ने भएको छ । उक्त समारोहमा शब्दयात्रा प्रकाशनद्वारा हरेक वर्षको जेठ महिनामा समर्पण गरिने चार विधाका सम्मानहरू समर्पण गर्नुका साथै पाँचवटा पुस्तक सार्वजनिक गरिनेछन् ।
यस वर्षको शब्दयात्रा सिर्जना सम्मानबाट ‘माटो’ नियात्रासङ्ग्रहका लागि पोष चापागाईं (२००८, भोजपुर हाल काठमाडौँ) लाई, नन्दिकेश्वर अधिकारी शोध सम्मानबाट अग्रज पत्रकार नकुलकाजी (२००२, ताप्लेजुङ हाल झापा) लाई, राष्ट्रिय गजल सम्मानबाट डा. कृष्णजङ्ग राणा (१९९०, बाँके हाल ललितपुर) लाई र प्रशासनिक महिला प्रतिभा सम्मानबाट शुभ (शुभलक्ष्मी) श्रेष्ठ (२००६, पाल्पा हाल काठमाडौँ) लाई सम्मान गर्ने निर्णय भइसकेको छ ।
उक्त समारोहमा साहित्यकार तथा पूर्वप्रशासक शिवभक्त शर्माद्वारा लिखित अनुभव र अनुभूतिको सङ्ग्रह ‘प्रशासनिक दाउपेच’, डा. सुरेन्द्र प्रधानद्वारा नेपाली भाषामा लिखित तथा डा. हेमराज काफ्लेद्वारा अङ्ग्रेजी भाषामा अनूदित ‘नोभेलिस्टिक आर्टिस्ट्री अफ लैनसिंह बाङ्देल’, केदारनाथ तिमल्सिनाद्वारा लिखित कविता तथा गीतहरूको सङ्ग्रह ‘भावनाका भुल्का’, महाकाव्यकार कविप्रसाद प्याकु¥यालद्वारा श्रीधर प्याकु¥याल नामबाट गरिएको काव्यात्मक अनुवाद ‘सत्यनारायण व्रतकथा’ र ग्रामकवि रोजनाथ लुइँटेलद्वारा लिखित कवितासङ्ग्रह ‘सबैतिर कम्पनको चोट’ सार्वजनिक हुनेछन् । ती पाँचैवटा पुस्तकहरू शब्दयात्रा प्रकाशनद्वारा प्रकाशित भएका हुन् ।

शब्दयात्रा लेखक समाजको कार्यसमितिको बैठकले नयाँ कार्यसमितिको गठन गराइदिनका लागि शब्दयात्रा प्रकाशनलाई अनुरोध गर्दै कार्यसमितिलाई नै भङ्ग गर्ने निर्णय गरेको छ ।
गत जेठ १ गते शब्दयात्रा लेखक समाजका सभापति डा. श्याम भट्टराईको अध्यक्षतामा बसेको कार्यसमितिको बैठकले कार्यसमितिको पुनर्गठन गराइदिन शब्दयात्रा प्रकाशनलाई अनुरोध गर्ने निर्णय गरेको हो ।
शब्दयात्रा लेखक समाजको कार्यसमितिको कार्यकाल पनि समाप्त भइसकेको स्थिति भएकाले शब्दयात्रा लेखक समाजका सदस्यहरूको भावनाअनुसार शब्दयात्रा प्रकाशनले यथासम्भव सर्वसम्मत रूपमा शब्दयात्रा लेखक समाजको कार्यसमितिको पुनर्गठन गराउने भएको छ ।

शब्दयात्रा प्रकाशनबाट हरेक वर्ष जेठ महिनामा समर्पण गरिने शब्दयात्रा सिर्जना सम्मान, राष्ट्रिय गजल सम्मान, नन्दिकेश्वर अधिकारी शोध सम्मान र प्रशासनिक महिला प्रतिभा सम्मान गरी चार विधाका सम्मानहरूबाट यस वर्ष क्रमशः नियात्राकार पोष चापागाईं (भोजपुर), अग्रज गजलकार डा. कृष्णजङ्ग राणा (नेपालगन्ज), वरिष्ठ पत्रकार नकुलकाजी (झापा) र पूर्वप्रशासक शुभलक्ष्मी श्रेष्ठ (काठमाडौँ) लाई सम्मानित गरिने भएको छ । हरेक सम्मानमा अभिवन्दनापत्र, नगद रु. ५ हजार, किरीट र उपहार समर्पण गर्ने गरिएको छ ।
शब्दयात्रा प्रकाशनद्वारा २०७२ सालभरिमा प्रकाशित १८ वटा कृतिहरूमध्ये अधिकांश पाठकले मन पराएको आधारमा ‘माटो’ (नियात्रासङ्ग्रह) का नियात्राकार पोष चापागाईं (२००८ साल) लाई शब्दयात्रा सिर्जना सम्मान, गजल विधामार्फत साहित्यिक क्षेत्रमा विशिष्ट योगदान दिनुभएकोमा डा. कृष्णजङ्ग राणा (१९९० साल) लाई राष्ट्रिय गजल सम्मान, कवि नन्दिकेश्वर अधिकारीका साहित्यिक सन्ततिहरूलाई साहित्यिक क्षेत्रमा अघि बढ्न सहयोग गर्ने नकुलकाजी (२००२ साल) लाई नन्दिकेश्वर अधिकारी शोध सम्मान र प्रशासनिक क्षेत्रमा संलग्न भएर साहित्यिक क्षेत्रमा पनि योगदान पु¥याउने प्रेरक महिला शुभलक्ष्मी श्रेष्ठ (२००६ साल) लाई प्रशासनिक महिला प्रतिभा सम्मानबाट सम्मानित गर्न लागिएको हो ।
सम्मानका लागि योग्य व्यक्तित्वको नाउँ सिफारिस गर्न शब्दयात्रा प्रकाशनले ‘नेपालभूमि’ साप्ताहिक पत्रिका र ‘शब्दसञ्चार’ रेडियो कार्यक्रमबाट सार्वजनिक आह्वान गरेको थियो भने ४ सदस्यीय चयन समिति पनि बनाएको थियो । त्यसअनुसार प्राप्त भएका नाउँहरू शब्दयात्रा प्रकाशनले सम्मानित व्यक्तित्व चयन समितिमा उपलब्ध गराएको थियो । उक्त समितिले प्राप्त भएका नाउँँहरूमाथि विस्तृत छलफल गरेर ४ जनालाई सम्मान गर्नका लागि चयन गरेको हो ।
सम्मानित व्यक्तित्व चयन समितिमा संयोजक गोविन्दलाल प्रधानाङ्ग तथा सदस्यहरू खेमराज निरौला, कृष्णप्यारी नकर्मी र पदमनाथ ढुङ्गाना रहनुभएको छ ।
उल्लिखित सम्मानहरूको आर्थिक व्यवस्थापन क्रमशः कल्याण लम्साल, रुक्मिणी सिग्देल, गीता मञ्जुश्री र उर्मिला श्रेष्ठ भोजपुरेले गर्नुभएको हो ।
सम्मान समर्पण गरिने दिन ‘नेपालभूमि साप्ताहिक’ ले सम्मान कार्यक्रमसम्बन्धी विशेष पृष्ठको प्रकाशन गर्ने गरेको छ ।