शब्दयात्रा प्रकाशनद्वारा प्रकाशित विचारप्रधान राष्ट्रिय साप्ताहिक ‘नेपालभूमि’ का व्यवस्थापन प्रमुख कविराज ढकालले अबदेखि ‘नेपालभूमि’ मा आबद्ध नरहने जानकारी गराउनुभएको छ ।
‘नेपालभूमि’ साप्ताहिक परिवार कविराज ढकालले हालसम्म गर्नुभएको सशुल्क सेवाका लागि धन्यवाद व्यक्त गर्दछ ।

शब्दयात्रा प्रकाशनले काठमाडौँको कपनमा सम्पर्कस्थल बनाएको छ । काभ्रेको बनेपामा केन्द्रीय कार्यालय रहेको शब्दयात्रा प्रकाशनलाई अन्यत्र पनि विस्तार गर्दै जाने लक्ष्यअनुरूप काठमाडौँको कपनमा सम्पर्कस्थल बनाइएको हो ।
शब्दयात्रा प्रकाशनले कपन सम्पर्कस्थलको जिम्मा शब्दयात्रा सम्मान व्यवस्थापक समाजका सदस्य कविप्रसाद (श्रीधर) प्याकु¥याललाई दिएको छ ।

शब्दयात्रा प्रकाशनले बनेपा नगरपालिका वडा नं. ११ मा अवस्थित नीलकण्ठेश्वर महादेव मन्दिरको निकट रहेको आफ्नो जग्गाको परिसरलाई ‘कृष्णगीता परिसर’ नाम राख्ने निर्णय गरेको छ ।
उक्त जग्गा समाजसेवी कृष्णमणि कुइँकेलले शब्दयात्रा प्रकाशनलाई दान गरी हक हस्तान्तरण गर्नुभएको हुँदा उहाँ र उहाँकी धर्मपत्नी भोजकुमारी (गीता) कुइँकेलको सम्मानस्वरूप उक्त परिसरको नाम ‘कृष्णगीता परिसर’ राख्ने निर्णय गरिएको हो ।

शब्दयात्रा प्रकाशन सञ्चालक समितिको बैठकले शब्दयात्रा प्रकाशनलाई बनेपा नगरपालिका क्षेत्रभित्रको ३ आना जग्गा दान गर्नुभएका समाजसेवी कृष्णमणि कुइँकेलप्रति कृतज्ञता व्यक्त गर्ने निर्णय गरेको छ ।
शब्दयात्रा प्रकाशनका अध्यक्ष हरि मञ्जुश्रीको अध्यक्षतामा बसेको बैठकले उक्त निर्णय गरेको हो ।

शब्दयात्रा प्रकाशनका अध्यक्ष हरि मञ्जुश्री, नेपाली काङ्ग्रेस काभ्रेका सभापति मधु आचार्य र समाजसेवी इन्द्रमणि अधिकारीलाई देवीप्रसाद सापकोटा स्मृति प्रतिष्ठानले गत भदौ २५ गते शनिबार मानार्थ सदस्यता प्रदान गरेको छ ।
देवीप्रसाद सापकोटा स्मृति प्रतिष्ठानको साधारण सभाका लागि आयोजित समारोहमा सहकारी तथा गरिबी निवारण मन्त्री हृदयराम थानीले उहाँहरूलाई मानार्थ सदस्यताको प्रमाणपत्र प्रदान गर्नुभएको थियो ।
प्रतिष्ठानले हरि मञ्जुश्री, मधु आचार्य, इन्द्रमणि अधिकारी, कविता सिटौला, सोमप्रसाद हुमागाईं, लक्ष्मण हुमागाईं र अच्युत पौडेल सम्मिलित सल्लाहकार समिति बनाएको छ भने सुनील सापकोटाको अध्यक्षतामा १५ सदस्यीय नयाँ कार्यसमितिको गठन पनि गरेको छ ।

शब्दयात्रा प्रकाशनले ७३ औँ प्रकाशनपुष्पका रूपमा ‘हामी अब गर्छौं’ नामक लघुकाव्य प्रकाशन गर्ने भएको छ । यस काव्यका काव्यकार गणेशबहादुर खत्री हुनुहुन्छ ।
यही भदौ महिनाको अन्तिममा ‘हामी अब गर्छौं’ लाई सार्वजनिक गरिने गरी कार्यक्रम तय भएको छ ।
‘हामी अब गर्छौं’ गणेशबहादुर खत्रीद्वारा लिखित कृतिहरूमध्ये शब्दयात्रा प्रकाशनद्वारा प्रकाशित छैटौँ कृति हो भने कृतिकारको पन्ध्रौँ कृति हो ।

शब्दयात्रा प्रकाशनको साधारण सभा सम्पन्न भएको छ ।
सभाले विभिन्न प्रस्तावहरू पारित गर्नुका साथै वार्षिक कार्यक्रम तथा बजेट पनि स्वीकृत गरेको छ ।