शब्दयात्रा प्रकाशनले २०८३ सालको ‘शब्दयात्रा हंसराज श्रेष्ठ सामाजिक जागरण सम्मान इन्दिरा दली (ललितपुर) मा समर्पण गर्ने भएको छ । यस सम्मानको कोष व्यवस्थापन समाजसेवी हंसराज श्रेष्ठको स्मृतिमा व्यवसायी आनन्दराज श्रेष्ठ (काभ्रेपलाञ्चोक) ले गर्नुभएको हो । सम्मान समर्पण समारोह आगामी जेठ महिनाको २३ गते शनिबार शब्दयात्रा प्रकाशनको सभाकक्ष बनेपामा आयोजना गरिनेछ । सम्मान ग्रहण गर्न स्वीकृति प्रदान गर्नुभएकोमा इन्दिरा दलीप्रति शब्दयात्रा प्रकाशन परिवार हार्दिक आभार प्रकट गर्दछ ।

शब्दयात्रा प्रकाशनले २०८३ सालको ‘शब्दयात्रा रामकृष्ण श्रेष्ठ विज्ञान–प्रविधि सम्मान’ प्रा. डा. गजेन्द्र शर्मा (स्याङ्जा) मा समर्पण गर्ने भएको छ । यस सम्मानको कोष व्यवस्थापन रामकृष्ण स्मृति प्रतिष्ठानका तर्फबाट सहकारीकर्मी तथा लेखिका निर्मला श्रेष्ठ (काभ्रेपलाञ्चोक) ले गर्नुभएको हो । सम्मान समर्पण समारोह आगामी जेठ महिनाको २३ गते शनिबार शब्दयात्रा प्रकाशनको सभाकक्ष बनेपामा आयोजना गरिनेछ । सम्मान ग्रहण गर्न स्वीकृति प्रदान गर्नुभएकोमा प्रा. डा. गजेन्द्र शर्माप्रति शब्दयात्रा प्रकाशन परिवार हार्दिक आभार प्रकट गर्दछ ।

     शब्दयात्रा प्रकाशनले २०८३ सालको ‘शब्दयात्रा बेलप्रसाद श्रेष्ठ दानशीलता सम्मान’ दुई साहित्यिक संस्था साहित्य सङ्गम मकवानपुर र सिस्नुपानी नेपाल मकवानपुरलाई २–२ धुर जग्गा प्रदान गर्नुभएका दाता आर. सी. रिजाल (रामचन्द्र रिजाल, मकवानपुर) मा समर्पण गर्ने भएको छ । यस सम्मानको कोष व्यवस्थापन समाजसेवी तथा लेखक बेलप्रसाद श्रेष्ठ (काभ्रेपलाञ्चोक) ले गर्नुभएको हो । सम्मान समर्पण समारोह आगामी जेठ महिनाको २३ गते शनिबार शब्दयात्रा प्रकाशनको सभाकक्ष बनेपामा आयोजना गरिनेछ । सम्मान ग्रहण गर्न स्वीकृति प्रदान गर्नुभएकोमा आर. सी. रिजालप्रति शब्दयात्रा प्रकाशन परिवार हार्दिक आभार प्रकट गर्दछ ।

लेखक तथा पूर्वमन्त्री दीनबन्धु अर्यालद्वारा लिखित पुस्तक ‘युगपुरुष महाकाव्यको अध्ययन’ शब्दयात्रा प्रकाशनबाट छापिने भएको छ । ‘युगपुरुष’ महाकाव्य सिर्जना खनालले लेख्नुभएको हो । यो महाकाव्य पनि शब्दयात्रा प्रकाशनबाटै छापिएको थियो । यस महाकाव्यमा भरत जङ्गमको जीवनयात्रा, राष्ट्रिय चरित्र र अन्तर्राष्ट्रिय योगदानलाई जीवन्त स्वरूपमा उतारिएको छ । प्राच्य सिद्धान्तबाट निर्धारित लक्षणहरू समावेश गराएर महाकाव्यलाई यथासम्भव पूर्ण पार्ने प्रयास गरिएको छ । त्यही महाकाव्यको शल्यक्रिया गर्ने क्रममा दीनबन्धु अर्यालले ‘युगपुरुष महाकाव्यको अध्ययन’ पुस्तक लेख्नुभएको हो । यस पुस्तकमा डा. शास्त्रदत्त पन्त, मुकुन्द शर्मा चालिसे, माधव वियोगी, कलानिधि दाहाल र कुलप्रसाद पराजुलीले मन्तव्य लेख्नुभएको छ । आफ्नो पुस्तकको प्रकाशन गर्ने क्रममा शब्दयात्रा प्रकाशनको स्मरण गर्नुभएकोमा लेखक दीनबन्धु अर्यालप्रति हार्दिक आभार व्यक्त गर्दछु । यो पुस्तकसमेत शब्दयात्रा प्रकाशन प्रकाशक बनेका पुस्तकहरूको सङ्ख्या २७६ पुगेको छ ।

सुप्रसिद्ध साहित्यकार प्रा. रामकुमार पाँडेको आयोजनामा उहाँकै निवास जाउलाखेलमा आयोजित कार्यक्रममा हरि मञ्जुश्रीका आध्यात्मिक र राष्ट्रभक्ति गानका विषयमा चर्चा गरियो । कार्यक्रममा हरि मञ्जुश्रीले आफूद्वारा लिखित तथा सङ्गीतबद्ध दुईवटा गान प्रस्तुत गर्दै आफ्नो साङ्गीतिक यात्राका बारेमा जानकारी गराउनुभयो । त्यसपछि गीतकारद्वय डा. बमबहादुर थापा जिताली र त्रिविक्रम पाण्डे, गायकद्वय दिवाकर खड्का र वसन्त कुइकेल, पत्रकारद्वय बलदेव थापा र प्रताप राना तथा साहित्यिक पत्रकार श्रीराम पौडेल उदासीले हरि मञ्जुश्रीको गीत, सङ्गीत र गायनका बारेमा आआफ्नो धारणा व्यक्त गर्नुभयो । अन्त्यमा कार्यक्रमलाई समापन गर्ने क्रममा सभापति प्रा. रामकुमार पाँडेले हरि मञ्जुश्री संस्थापक अध्यक्ष रहेको शब्दयात्रा प्रकाशनलाई नेपाली भाषा, साहित्य र सङ्गीतको अनुसन्धान केन्द्रका रूपमा विकास गर्न सकिने धारणा राख्दै त्यसका लागि गर्न सकिने विभिन्न योजनाहरू प्रस्तुत गर्नुभयो । कार्यक्रमको संयोजन तथा सञ्चालन डा. इन्दुल केसीले गर्नुभएको थियो । कार्यक्रमका सहभागीहरूलाई प्रा. डा. कुलप्रसाद कोइरालाद्वारा लिखित ‘हरि मञ्जुश्रीका उदबोधन गान’ र डा. इन्दुल केसीद्वारा लिखित ‘हरि मञ्जुश्रीका जागरण गान’ नामका दुई पुस्तक प्रदान गरिएको थियो ।